İndoneziyanın Azərbaycandakı səfiri Prayono Atiyantonun APA-ya müsahibəsi

Azərbaycan-İndoneziya münasibətlərinin inkişaf perspektivlərini necə görürsünüz?

- Hazırda hər iki ölkə arasında gözəl siyasi münasibətlər mövcuddur. Biz iqtisadi əməkdaşlığı da genişləndirmək istəyərdik. Azərbaycanla İndoneziya arasında iqtisadi, mədəni və sosial münasibətlərin səviyyəsini mövcud siyasi münasibətlərin səviyyəsinə qaldırmağa çalışırıq.

- İndoneziya neft resursları ilə zəngin ölkədir. Ölkələrimiz arasında energetika sahəsində əməkdaşlığı necə görürsünüz?

- Bəli, İndoneziya neft hasilatçısıdır, lakin bizim resurslar kifayət qədər deyil. Resurslar gec-tez tükənir, buna görə də biz alternativ enerji mənbələrinin inkişafı üzərində çalışırıq. Bu istiqamətdə Azərbaycanla əməkdaşlığı genişləndirmək istərdik. Biz texniki əməkdaşlığı da genişləndirə bilərik, hər iki ölkə enerji resurslarının hasilatı və emalı sahəsində təcrübəyə malikdir.

- Səfirliyiniz nəzdində konsulluq şöbəsi açmağı planlaşdırırsınız?

- Demək olar ki, şöbə mövcuddur, lakin bəzi texniki xarakterli problemlərə görə vizaların verilməsinə təxminən bir ay sonra başlanacaq.

- İndoneziyanın Dağlıq Qarabağ məsələsində rəsmi mövqeyi necədir?

- Bu məsələdə Azərbaycanın yanındayıq. Biz dövlətlərin ərazi bütövlüyü prinsipini dəstəkləyirik. İndoneziya münaqişənin sülh yolu ilə həllini istəyir, başqa cür ola da bilməz, axı Azərbaycan və Ermənistan qonşudurlar.

- Azərbaycan İndoneziyada nə qədər tanınır?

- Təəssüf ki, Azərbaycan İndoneziyada o qədər də tanınmır. Lakin Azərbaycanın İndoneziyadakı səfirliyi Azərbaycan mədəniyyətinin ölkədə təbliğatı məqsədilə yaxşı iş aparır. İndoneziya da öz növbəsində ölkənin Azərbaycanda populyarlığını artırmaq üçün iş aparır. Ölkəmiz aprelin 12-14-də ilk dəfə 11-ci Azərbaycan Turizm və Səyahət Beynəlxalq Sərgisində iştirak edəcək. Sərgiyə İndoneziyadan qonaqlar da qatılacaqlar.

- Ölkələrimiz bir-birindən nə öyrənə bilərlər?

- Hər iki ölkənin energetika sahəsində böyük təcrübəsi var, biz təcrübə mübadiləsi apara bilərik. Həmçinin biz mədəniyyət və təhsil sahəsində qarışılıqlı mübadilə proqramları həyata keçirməyi planlaşdırırıq. Qeyd etmək istərdim ki, İndoneziyanın mədəniyyət və məişəti ilə daha yaxından tanış olmaq üçün hər il Azərbaycandan ölkəmizə tələbələr göndərilir. Biz həmçinin magistrlər üçün proqram təklif edirik.

- Yaxın zamanlarda hansı birgə layihələrin həyata keçirilməsi gözlənilir?

- Biz birbaşa ticarət əlaqələri qurmaq istərdik. Hazırda iki ölkə arasında idxal-ixrac əməliyyatları üçüncü dövlətlər vasitəsilə həyata keçirilir. Biz bu vəziyyəti dəyişməyə çalışacağıq.