Azərbaycan İsraildən aldığı silahları üçüncü dövlətə, o cümlədən İrana qarşı heç zaman istifadə etməyəcək. Bunu SalamNews-a Milli Məclisin İnsan hüquqları komitəsinin sədr müavini, Azərbaycan-İsrail parlamentlərarası dostluq qrupunun sədri Yevda Abramov bildirib.

Azərbaycanın yaxşı qonşuluq siyasəti həyata keçirdiyini diqqətə çatdıran deputat söyləyib ki, rəsmi Bakı İran ilə münasibətlərin yaxşı olmasına hər zaman əhəmiyyət verir. Hazırda Azərbaycan Ermənistan ilə müharibə şəraitində yaşayır: “Azərbaycan topaqlarının 20 faizi Ermənistanın işğalı altındadır. Ərazi bütövlüyünü və müdafiəsini təmin etmək üçün hər bir ölkə silah ala bilər. Silahın hansı ölkədən alıb-almamasını Azərbaycan dövlətinin daxili işidir. Azərbaycan heç bir xarici ölkənin daxili işlərinə qarışmadığı kimi, İran da Azərbaycanın daxili işlərinə qarışmamalıdır. Rəsmi Bakı dəfələrlə bəyan edib ki, Azərbaycan İrana qarşı yaradılan heç bir bloka qoşulmayacaq və öz ərazisindən bu ölkəyə qarşı istifadəyə imkan verməyəcək”.

Deputat bildirib ki, hazırda sülh danışıqları gedir, lakin Azərbaycan istənilən an işğalçı Ermənistana qarşı müharibəyə başlaya bilər.