Cənubi Koreyanın paytaxtı Seul şəhərində Nüvə Təhlükəsizliyi Sammiti öncəsi Türkiyənin baş naziri Rəcəb Tayyip Ərdoğanın ABŞ prezidenti Barak Obama ilə görüşündə Dağlıq Qarabağ münaqişəsinin həlli məsələsi də müzakirə olunub.

APA-nın Türkiyə KİV-inə istinadən verdiyi məlumata görə, bu barədə jurnalistlərə açıqlamasında baş nazir Ərdoğan bildirib.

Ərdoğan görüşdə Ermənistan və Azərbaycan arasında Dağlıq Qarabağ münaqişəsinin həlli ilə bağlı fikirlərini B. Obamaya çatdırdığını söyləyib: «ATƏT-in Minsk Qrupu üçlüyünün Ermənistan və Azərbaycan arasındakı münaqişəni 20 ildir həll edə bilmədiyini xatırlatdım. Bir təklif verdim: “Madam ki, bu məsələ dalana dirənib, lazım olsa, biz Azərbaycanla danışaq, Fransa, Rusiya və siz də ermənilərlə danışın, razı salın, bu problemi həll edək” dedim. Uydurma erməni soyqırımı məsələsini də danışdıq. Əslində o da narahatdır. Bu məsələ onun da qarşısında dayanır. Amma çox təəssüf ki, «siyasətçiyik, yox saymırıq» deyən kimi idi. Mən ona «Biz artıq bezdik», - dedim. Hər il aprel ayında eyni məsələ. Respublikaçılar gəlir, eyni məsələ, demokratlar gəlir, eyni məsələ. Bizim atdığımız addımları qeyd etdim. Akdamar adasını nümunə göstərdim».

Ərdoğan onu da əlavə edib ki, görüşdə B. Obama Vicdan Azadlığı Hesabatında Türkiyənin əldə etdiyi nailiyyətlər üçün ona təşəkkür edib.