Lord Əhməd: “Biz Ermənistan hökumətini beynəlxalq hüquqa əməl etməyə və Azərbaycan ərazilərini qaytarmağa çağırırıq”

Fevralın 22-də London şəhərində Xocalı faciəsinin 20-ci ildönümü ilə əlaqədar tədbir keçirilib. Avropa Azərbaycan Cəmiyyətinin təşkil etdiyi tədbirdə Birləşmiş Krallıqdan və digər ölkələrdən 300-ə yaxın nümayəndə iştirak edib. Cəmiyyətdən APA-ya verilən xəbərə görə, AAC-ın incəsənət və mədəniyyət üzrə məsləhətçisi, Avropa Mədəniyyət Parlamentinin üzvü Səbinə Rakçeyeva çıxışında deyib ki, Londonun mərkəzində keçirilən bu tədbir Xocalı qurbanlarının yad edilməsinə həsr olunub: “Azərbaycanın müasir tarixində baş verən bu dəhşətli faciə heç bir ölkənin tarixində təkrarlanmamalıdır”.

Britaniya parlamentinin Azərbaycan üzrə qrupunun üzvü Kris Hiton-Harris iki dəfə Azərbaycana səfər etdiyini söyləyib: “Birləşmiş Krallığın Azərbaycanla möhkəm əlaqələri var və bunun tarixi Birinci Dünya müharibəsinə gedib çıxır. Azərbaycan üzrə parlament qrupundakı həmkarlarım və mən 20 ildən bəri davam edən bu münaqişənin həllini arzulayırıq”.

Azərbaycan üzrə parlament qrupunun üzvü lord Əhməd də eyni hissləri bölüşüb: “Bu gün biz Xocalı qətliamının qurbanı olmuş 613 kişi, qadın və uşağın xatirəsini yad edirik. Unutmamalıyıq ki, bu qədər günahsız insanın həyatına son qoyulub. Onların xatirəsi həmişə yaşayacaq. Ümid edirik ki, münaqişə həll olunacaq. Biz Ermənistan hökumətini beynəlxalq hüquqa əməl etməyə və Azərbaycan ərazilərini qaytarmağa çağırırıq”.

Avropa Azərbaycan Cəmiyyətinin sədri və təsisçisi Tale Heydərov isə çıxışında Xocalı faciəsinin dəhşətli cinayət olduğunu, bu zorakılığın bu günə qədər davam etdiyini vurğulayıb: “Günahkarlar hələ də cəzalandırılmayıb. İşğal olunmuş Dağlıq Qarabağ bölgəsi Azərbaycan mədəniyyətinin mərkəzi olub. Bu gün dinləyəcəyiniz konsertdə əsərləri səslənən bəstəkarların əksəriyyəti orada dünyaya gəlib. İndi bu bölgədən olan insanlar öz ölkələrində məcburi köçkünə çevriliblər və bu mədəniyyət yox olmaq təhlükəsi ilə üzləşib. Ümidvarıq ki, bugünkü konsert diqqəti Xocalı faciəsinə çəkəcək və bu cür faciələrin gələcəkdə təkrarlanmasının qarşısı alınacaq”.

Tədbirdə AAC-ın çəkdiyi sənədli film nümayiş olunub. Filmdə Xocalı faciəsinin şahidlərinin, Qərb ekspertlərinin və britaniyalı jurnalistlərin müsahibələri əksini tapıb. Film BMT Təhlükəsizlik Şurasının qətnamələrinə məhəl qoyulmadan Dağlıq Qarabağ və yeddi ətraf rayonun qanunsuz işğalının davam etməsi faktına diqqət çəkir.

Filmin ardınca Nikolas Kollon (Nicholas Collon) və Syu Perkinsin (Sue Perkins) dirijorluğu ilə Orion Orkestri Qərb və Azərbaycan klassik musiqi əsərlərini, o cümlədən Samuel Barber, Ser Edvard Elgar və Qara Qarayevin əsərlərini ifa edib. Ən yaddaqalan məqam Səbinə Rakçeyevanın öz “Dua” əsərini və Stiven Spilberqin çəkdiyi “Şindlerin siyahısı” filminin musiqisini ifa etməsi olub.

Konsert AAC tərəfindən təşkil olunmuş anım tədbirlərinin bir hissəsidir. Bu tədbirlər çərçivəsində Londonun şimal-qərbində faciə qurbanlarının hər birinin xatirəsinə 613 ağac əkilib.