“Xocalı soyqırımı 20 il öncə dünyanın gözü önündə baş verən və insanlıq adına utanc gətirən hadisədir”.

APA-nın xəbərinə görə, bunu Azərbaycanda səfərdə olan Türkiyənin daxili işlər naziri İdris Naim Şahin jurnalistlərə açıqlamasında deyib. Nazir bu cür qətliamların dünyanın müxtəlif ölkələrində baş verdiyini bildirib: “Türkiyə dünyanın harasında baş verməsindən asılı olmayaraq, insanlığa qarşı yönələn qətliamları qınayır və buna qarşıdır. Türkiyə insanlığın yaşamasını istəyir. Tarixdə bizi utandıracaq hər hansı olay yoxdur. Türk milləti heç bir zaman, dünyanın heç bir yerində məzlumlara əl qaldırmayıb. Amma haqsız yerə bizim insanlara hücum edilibsə, türk milləti bütün gücü ilə özünü müdafiə edib və edəcək”.

İdris Naim Şahin deyib ki, Xocalı soyqırımının 20-ci ildönümü Azərbaycanda olduğu kimi, Türkiyə də diqqətlə xatırlanır və anılır. Nazir bununla bağlı Ankarada, İstanbulda, Türkiyənin digər şəhərlərində anım tədbirlərinin keçirildiyini qeyd edib. İdris Naim Şahin Xocalı soyqırımına görə, Azərbaycan xalqına başsağlığı verib.

Nazir bu gün səfər çərçivəsində Azərbaycan prezidenti İlham Əliyevlə görüşdüyünü, görüşdə ölkələr arasında siyasi, iqtisadi, təhlükəsizlik məsələləri ilə bağlı müzakirələr aparıldığını deyib. Onun sözlərinə görə, görüşdə iki ölkə arasında əməkdaşlığın mövcud vəziyyəti yüksək qiymətləndirilib.

Qeyd edək ki, Türkiyənin daxili işlər naziri İdris Naim Şahinin səfəri Azərbaycanın daxili işlər naziri Ramil Usubovun dəvəti əsasında gerçəkləşib.