“Azərbaycan özünün xarici əlaqələrindən heç zaman İrana qarşı istifadə etməyib, istifadə edilməsinə də imkan verməyib”

“Biz İranla xarici siyasətimizi mehriban qonşuluq, qarşılıqlı faydalı əməkdaşlıq üzərində qururuq. Bir-birinin daxili işlərinə qarışmamaq, xarici ölkələrlə əlaqələrdə bir-birinin maraqlarına ziyan vurmamaq, bir-biri ilə münasibətlərə xələl gətirməmək bizim bu ölkə ilə yürütdüyümüz diplomatik siyasətin əsas istiqamətini təşkil edir. Son zamanlar Azərbaycan Milli Təhlükəsizlik Nazirliyi bu ölkəyə bağlı müəyyən çevrələr tərəfindən Azərbaycanda həyata keçirilməsi planlaşdırılan bəzi arzuolunmaz, o cümlədən terror cəhdlərinin qarşısının alınması istiqamətində müvəffəqiyyətli əməliyyat həyata keçirdi. İranın bəzi dairələri əsası olmayan şəkildə məhz buna cavab olaraq “alternativ tədbir” kimi Azərbaycana qarşı, onu bu və ya digər fəaliyyətdə ittiham edən, günahlandıran nota verib. Bu bizim arzu etdiyimiz hal deyil”.

Bunu APA-ya açıqlamasında Azərbaycan Prezident Administrasiyası İctimai-siyasi şöbəsinin müdiri Əli Həsənov deyib. Şöbə müdiri bildirib ki, Azərbaycan özünün xarici siyasətini yalnız dövlət maraqları, təhlükəsizliyi çərçivəsində qurur: “Eyni zamanda, Azərbaycan özünün xarici əlaqələrindən İrana qarşı, eləcə də digər qonşu dövlətlərə qarşı heç zaman istifadə etməyib, istifadə edilməsinə də imkan verməyib. Ona görə də bu şəkildə günahlandırmaların əsası yoxdur”.

Ə. Həsənov iki ölkə arasında gərginliyin olması barədə fikirlərlə də razılaşmayıb: “Mən deməzdim ki, iki ölkə arasında vəziyyət gərgindir. Lakin münasibətləri gərginləşdirməyə cəhd göstərən insanlar, dairələr var. Bu isə nə İranın, nə də Azərbaycanın xeyrinədir. Azərbaycan həmişə bütün tədbirlərdə İranın maraqlarını nəzərə alıb, bundan sonra da almaq fikrindədir. İran bizimlə müştərək tarixi, dini bölüşən, on milyonlarla soydaşımızın azərbaycanlıların yaşadığı bir ölkədir. Bu ölkənin maraqları bizim həmişə diqqətimiz mərkəzində olub və bu maraqların pozulmasına, heç bir anti-İran fəaliyyətinə yer verməmişik. Eyni şeyləri İrandan da tələb edirik və düşünürük ki, bu, belə də olacaq”.