Böyük Britaniyanın Azərbaycandakı səfiri: “Mən bu fotolarda gördüklərimdən şoka düşmüşəm”

Fevralın 20-də Bakı Muzey Mərkəzində Xocalı faciəsinin 20 illiyi münasibətilə fransalı fotoqraf, xanım Frederik Lengeynin (Frederique Lengaigne) fotolarından ibarət sərginin açılışı keçirilib. APA-nın xəbərinə görə, foto-sərgi Azərbaycan-Avropa Cəmiyyəti tərəfindən təşkil olunub.

Tədbirdə çıxış edən AAC-nın Azərbaycan nümayəndəliyinin rəhbəri Taleh Bağıyev bildirib ki, bu sərgidə göstərilən şəkillər real həyatı əks etdirir və fransalı fotoqrafın Xocalı faciəsi zamanı çəkdikləridir. O qeyd edib ki, sərgidə nümayiş olunan əsərlərin müəllifi hadisə baş verən zaman Qafqazda ezamiyyətdə olubvəbu şəkilləri çəkib. Lakin o bu şəkilləri indiyə qədər heç yerdə nümayiş etdirməyib.

Cəmiyyətin sədri Tale Heydərov sərginin açılışında bildirib ki, rəhbərlik etdiyi qurum Xocalı faciəsi haqqında həqiqətlərin dünya ictimaiyyətinə çatdırılması üçün fəal iş aparır: “Fotoqraf Lengeyn Xocalı hadisəsindən sonra Ağdamda olarkən 300-dən çox foto çəkib. Onların bir hissəsi bu gün sərgilənir. Fotoşəkil baş vermiş hadisənin inkarolunmaz sübutudur. Bu sərgi Avropanın bir sıra şəhərlərində, o cümlədən Brüssel, Strasburq və Parisdə də keçiriləcək”.

T. Heydərov yaxın günlərdə Londonda Xocalı faciəsi ilə bağlı məqalələr məcmusunun çapdan çıxacağını açıqlayıb.

Xanım Lengeyn isə Ağdamda keçirdiyi 3 gün ərzində dilemma qarşısında qaldığını söyləyib – baş vermiş hadisələri işıqlandırmaq, yoxsa ilk növbədə faciə qurbanlarına kömək etməyə çalışmaq? “Bu fotoşəkillər məni 20 il əvvəlin hadisələrinə geri qaytarır və məndə o insanlar qarşısında günahkarlıq hissi oyadır. Bu sərginin keçirməklə mən bir növ o insanlar qarşısında borcumu ödəyirəm”, - deyə fransalı jurnalist əlavə edib.

Fransa Senatının uydurma “erməni soyqırımı”nı inkarın kriminallaşdırılması haqqında qəbul etdiyi qanuna münasibətini bildirən F. Lengeyn bu qərarı yanlış saydığını vurğulayıb: “Mən bu qərarla razı deyiləm. Fransanın bununla əlaqədar hansı addımı atacağını bilmirəm, bu, Fransa hökumətinin işidir. Bu məsələ çox spesifik mövzudur və bilavasitə tərəflər arasında həll olunmalıdır”.

Tədbirdə həmçinin “Yahad- İn Unum” Assosiasiyasının sədri Patrik Desbois çıxış edib. O, təşkilatlarının missiyasının İkinci Dünya Müharibəsi dönəmində qətlə yetirilən yəhudilərin və qaraçıların qəbirlərinin aşkar edilməsi olduğunu nəzərə çatdırıb: “Bizə sual verilə bilər ki, bəs Azərbaycana niyə gəlmişik? Ona görə ki, Azərbaycan bir çox yəhudinin xilaskarı olub. İkinci Dünya Müharibəsində 0,5 milyon Azərbaycan əsgəri döyüşüb. Xocalı faciəsi ilə bağlı susmaq olmaz. Biz kütləvi qırğınlar üzərində Avropa, Amerika, müasir dünya qura bilmərik”.


Qeyd edək ki, açılışda bir sıra ölkələrin Azərbaycandakı səfirləri də iştirak edib. Britaniya səfiri Piter Beytman gördüklərindən şoka düşdüyünü gizlətməyib: “Fotosübutları görərkən o hadisələrin nə qədər faciəvi olduğunu anlayırsan. Mən bu fotolarda gördüklərimdən şoka düşmüşəm”.

Latviya səfiri Hardiys Baumanis isə bu fotolara baxmağın çətinliyindən danışıb: “Bu, insanların başına gələn böyük faciədir. Baş verənlər ədalətsizlikdir. Ümid edirəm ki, Dağlıq Qarabağ münaqişəsi mümkün olduğu qədər tez həll olunacaq və Azərbaycanın işğal edilmiş torpaqları geri qayıdacaq”.