Yəmənin cənubunda yerləşən Ədən şəhərində təhlükəsizlik qüvvələrinin hökumət əleyhinə nümayiş iştirakçılarına atəş açması nəticəsində 2 nəfər ölüb, 10-dan çox adam yaralanıb. Bu barədə şəhərin tibb qurumları məlumat veriblər.

SalamNews-un İTAR-TASS-a istinadən verdiyi xəbərə görə, şəhərin əsas meydanına toplaşmış 2 mindən çox nümayişçi ayın sonlarına planlaşdırılmış prezident seçkilərində xalqa daha çox hüquq verilməsini tələb edibər. Hökumət əleyhinə şüarları səsləndirdikdə sonra nümayişçilər təkərləri yandırmağa və yerli seçki komissiyasının binasına hücum etməyə çalışıblar. Hadisə yerinə gəlmiş polis qüvvələri kütləni dağıtmaq üçün gözyaşardıcı qazdan istifadə edib və nümayişçilərə atəş açıblar.

Artıq Yəməndə əhalini fevralın 21-də seçki dairələrinə gələrək ölkə başçısını seçməyə dəvət edən təbliğat kampaniyasına başlanılıb. Bununla belə, seçkidə faktiki olaraq, yalnız 1 namizəd- vitse-prezident Əbd Rəbbu Mənsur iştirak edir. Prezident seçiləcəyi tədqirdə, o ikiillik keçid dövründə ölkəyə başçılıq etməlidir.

Xatırladaq ki, Yəmənin sabiq prezidenti Əli Abdulla Saleh 2011-ci ilin noyabrında hakimiyyəti təhvil verməklə bağlı razılaşmanı imzalaması ölkədə davam edən gərgin siyasi böhrandan çıxmağa imkan verib. Hazırda ABŞ-da müalicə olunan Saleh seçkilərdən öncə ölkəyə qayıdaraq, müxalifət qismində siyasi fəaliyyətini davam etdirmək niyyətindədir.