İslam dünyası rəbbiül-əvvəl ayının 12-17-si tarixlərini əziz İslam Peyğəmbəri Həzrət Muhəmmədin (s) mövludu günləri kimi qeyd edir. İslamın böyük alimləri bu həftəni "Vəhdət həftəsi" elan ediblər.

SalamNews deyerler.org saytına istinadən xəbər verir ki, dünyanın hər bir yerində olduğu kimi, Azərbaycanda dad Həzrət Muhəmmədin (s) və 6-cı İmam Həzrət Sadiqin (ə) mövlud günləri böyük şövqlə qeyd olunur.

İçərişəhər “Cümə” məscidinin dini icması bu mövludlar münasibətilə bayram tədbiri təşkil edib. Bayram tədbiri müqəddəs Qurani-Kərimin tilavəti və dövlət himnimizin ifası ilə başlanılıb. Daha sonra "Əhli-beyt (ə) aşiqləri" qrupunun ifasında biri-birindən gözəl ilahilər səsləndirilib.

Tədbirdə çıxış edən Hacı İlqar İbrahimoğlu Peyğəmbər (s) sevərləri bu mövlud həftəsi münasibətilə təbrik edib. Əziz Peyğəmbərimizin (s) mövludunu yaşatmağın qururverici bir məsələ olduğunu vurğulayan Hacı İlqar, daha sonra bildirdi: “Bizim nəyimiz varsa, Peyğəmbərə (s) görə var. Nəinki bir insan olaraq, varlıq aləminin, mümkünat aləminin, yaradılış aləminin nəyi varsa, Peyğəmbərə (s) görə var. O, Allahın ilk yaratdığı ən ali bir varlıqdır. Ondan sonra hər şey ona görə yaradılıb.

Tədbirdə həmçinin sayca beşincisi keçirilən Mövlud Olimpiadasının qalibləri mükafatlandırılıb.

Qeyd edək ki, bu il Mövlud Olimpiadası uşaqlar arasında da keçirilib. Elə tədbirin mükafatlandırma hissəsində Olimpiadada iştirak edən uşaqlar da mükafatlandırılıb.

Daha sonra Həzrəti Rəsulallahın (s) mübarək mövludu və "Vəhdət Həftəsi" münasibətilə ənənəvi olaraq Azərbaycanda milli-mənəvi dəyərlərin geniş təbliğində, ölkədə İslam maarifçiliyinin inkişafına verdiyi böyük töhfəyə və həyata keçirtdiyi önəmli fəaliyyətə görə seçilən insanlara fəxri fərmanların verilməsi mərasimi keçirilib. Bu il adıçəkilən nominasiya üzrə fəxri fərmanla elimizin İslam ağsaqqalı mərhum Hacı Əlikram Əliyev və Nardaran ağsaqqalı, tanınmış ictimai fəal Kərbəlayi Natiq Kərimov təltif ediliblər. Mərhum Hacı Əlikram Əliyevin fəxri fərmanının ailəsinə çatdırılması üçün Hacı Hacıağa Nuriyə təqdim olunub.