Afina və Bütün Yunanıstanın dini lideri, arxiyepiskop Xristodolusun vəfatı ilə bağlı Yunanıstanın Bakıdakı səfirliyində anım mərasiminin keçirilməsi nəzərdə tutulur. Səfirliyin mətbuat və ictimaiyyət ilə iş üzrə əlaqələndiricisi Nərgiz Əsədovanın APA-ya verdiyi məlumata görə, vətəndaşlar səfirlikdə açılacaq başsağlığı kitabına öz ürək sözlərini yanvarın 30-da saat 11-dən 16-dək yaza bilərlər.

Yanvarın 31-də isə arxiyepiskopun dəfn mərasimi ilə əlaqədar olaraq Bakıdakı səfirlik fəaliyyətini bir günlük dayandıracaq. O həmçinin bildirib ki, arxiyepiskopun vəfatı ilə bağlı Yunanıstanda milli matəm elan olunub. Qeyd edək ki, Yunan Pravoslav Kilsəsinin rəhbəri, arxiyepiskop Xristodulos 69 yaşında xərçəng xəstəliyindən dünyasını dəyişib. Bu xəstəlik onda ötən ilin iyununda aşkarlanıb. Son həftələr səhhəti getdikcə pisləşən arxiyepiskop xəstəxanaya yerləşdirilməsinə etiraz edib.