Azərbaycan ilə Fransa arasında əlaqələrin dərin kökləri var və bu əlaqələr bu gün də qorunub saxlanılır. Bunun nəticəsidir ki, iki ölkə arasında əlaqələr uğurla inkişaf edir.

SalamNews-un məlumatına görə, bu fikri Milli Məclisin sədri Oqtay Əsədov fransalı parlamentarilərlə görüşündə bildirib.

Onun sözlərinə görə, indi iki ölkə arsında əlaqələr yeni mərhələyə qədəm qoyub. Hazırda Azərbaycanda 40-dan çox Fransa şirkəti fəaliyyət göstərir. Ölkələrimiz arasında diplomatik münasibətlərin 20 illiyi tamama olur və bu ilin fevralında diplomatik münasibətlərin 20 illiyi təntətnəli qeyd olunacaq.

Fransa Senatının “erməni soyqırırmı”nı tanıyanlara qarşı cəza nəzərdə tutan qərarın qəbul edilməsinə toxunan spiker bu məsələdə obyektiv və ədalətli mövqe tutan senatorlara minnətdarlığını bildirib.

O deyib ki, Senatın qərarı lə bağlı Milli Məclis müraciət qəbul edib və Senata ünvanlayıb. Spiker həmçinin Fransa Konstitusiya Məhkəməsinin bu məsələ ilə bağlı düzgün və obyektiv qərar çıxaracağına ümidvar olduğunu söyləyib.

Fransa Senatının nümayəndə heyətinin rəhbəri Natali Qule bildirib ki, parlamentlər tarix yazmamalıdır, bu tarixçilərin işidir.