Özünü Anonymous adlandıran haker qrupu "erməni soyqırımı"nı tanıyana qədər Türkiyənin rəsmi saytlarına hücum təşkil edəcəyini açıqlayıb.

SalamNews-un Türkiyə mətbuatına istinadla verdiyi xəbərə görə Anonymous, Türkiyə və ABŞ hökumətlərini "erməni soyqırımı"nı tanımağa çağırıb, əks təqdirdə rəsmi saytlara hücum təşkil etməklə hədələyib.

Qrupun "YouTube" saytında yerləşdirilən "Operation Armenian Genocide" (erməni soyqırımı əməliyyatı) adlı videoda bunlar deyilir: "1915-ci ildə Türklər milyonlarla ermənini öldürüb. İndi bu əməllərin əvəzini ödəmək məcburiyyətindəsiniz. Aralarında qadın və uşaqların da olduğu təxminən 2 milyon insan türklər tərəfindən öldürülüb və siz hələ soyqırım işləndiyini inkar edirsiniz. Fransaya qarşı etirazlarınız işə yaramayacaq. Fransa yüzlərlə tarixçinin dəstəklədiyi qanun layihəsini qəbul edəcək. Avropa İttifaqına üzv olmadınız və heç vaxt da üzv olmayacaqsınız. Bu sizə bir xəbərdarlıqdır. Soyqırımı tanıyana qədər türk hökumətinin internet saytlarına hücum etməyə başlayırıq".

İsmarıcda ABŞ-a bir il içində "erməni soyqırımı"nı tanımaq üçün vaxt verilir və Amerika hökuməti bu sözlərlə xəbərdar edilir: "Hər dörd ildən bir ABŞ-da prezident olmaq istəyən bütün dövlət səlahiyyətliləri erməni xalqına soyqırımı tanıyacağını söyləyir. Ancaq ABŞ hələ soyqırımı tanımayıb. Əgər bu gələcək il də davam etsə, ABŞ-ın da rəsmi saytlarına hücum etməyə başlayacayıq. "Erməni soyqırımı" əməliyyatı başladı".

Video yazı "Biz Anonymous. Biz bağışlamırıq. Biz unutmarıq. Bizi gözləyin ... " şüarı ilə sona çatır.