AKP ilə MHP baş örtüsünə qoyulan qadağanın ləğvi məsələsində anlaşdı

Türkiyədə qadınların hicab geyməsi məsələsi siyasi gündəmin ən önəmli müzakirə mövzusuna çevrilib. Əvvəlcə baş nazir Rəcəb Tayyib Ərdoğan Avropa ölkələrinə səfəri zamanı universitetlərdə baş örtüsünə qoyulan qadağanın götürülməsi məsələsi ilə bağlı təkliflər hazırlayacaqlarını açıqladı.

Lakin baş nazir ölkəyə dönmədən bu məsələ AKP ilə müxalifət, o cümlədən rektorları birləşdirən Yüksək Təhsil Şurası və başqa qurumlar arasında mübahisə predmetinə çevrildi. Milliyyətçi Hərəkat Partiyası gözlənilmədən bəyan etdi ki, bu qadağanın götürülməsində hökumətlə əməkdaşlıq etməyə hazırdır.
Əvvəlcə MHP Konstitusiyanın baş örtüsünə qadağa qoyan maddəsi ilə bağlı dəyişikliklər təklifini açıqladı. AKP bu təklifləri müsbət qarşılasa da onları qaneedici saymadı və öz təkliflərini irəli sürdü. Nəhayət, yanvarın 24-də iki partiyanın nümayəndələri məsələni müzakirə etmək üçün görüşüblər və görüşdə anlaşma əldə edildiyi haqda bəyanat verilib. Bu ittifaq yerli və xarici mətbuatda dərhal "hicab koalisiyası" adı alıb. Doğrudur, AKP ilə MHP hələ hicab məsələsində tam anlaşmayıblar və partiya nümayəndələri dünən yenidən danışıqlar aparmalı idi. Lakin danışıqlar təxirə salınsa da iki partiya arasında Türkiyədə dünyəvi dövlət üçün təhlükə sayılan hicab məsələsində əldə edilmiş ilkin razılıq siyasi çevrələrdə ciddi narahatlıq yaradıb.
Ana müxalifət partiyası olan CHP bu anlaşmaya görə MHP-ni tənqid edir. Mətbuatda da MHP-nin ünvanına tənqidlər eşidilir. Başqaları isə yazır ki, MHP-yə səs verənlər partiyanın bu addımından məyus olublar. Çünki MHP ötənilki parlament seçkilərində AKP-ni Atatürk cümhuriyyətinə təhlükə kimi təqdim edərək səs almışdı.
Gözlənilir ki, AKP və MHP bu gün parlamentdə aparılacaq danışıqlarda məsələ ilə bağlı yekun razılaşma əldə edəcəklər və Konstitusiyaya düzəliş təklifi hər iki partiyanın adından səsverməyə çıxarılacaq. Atatürkçü çevrələr isə bu anlaşma ilə bağlı AKP və MHP-ni sərt tənqid edir. Bunlardan biri keçmiş baş prokuror Sabih Kandoğludur. O deyib ki, dini simvol olan baş örtüsünü siyasi simvol halına gətirib bundan siyasi maraqları üçün istifadə etmək yolverilməzdir. CHP lideri Dəniz Baykal isə hökumətə müraciətlə "əgər arxayınsınızsa, Konstitusiyadakı dünyəvilik prinsipini birdəfəlik götürün" deyib.