Azərbaycanın İordaniyadakı səfirinin həyat yoldaşı, Azərbaycan və Rusiya yazıçılar ittifaqlarının, Beynəlxalq Rəssamlar Federasiyasının üzvü Elvira Araslının İordaniya haqqında yazdığı “İordaniya – lyubov moya (zapiski supruqi posla)” adlı kitabının ərəb dilinə tərcümə olunmuş nüsxəsi işıq üzü görüb.

Səfirlikdən APA-ya verilən məlumata görə, müəllif əsərində İordaniyanın tarixi zənginliyi, bu qədim torpağın unikallığı, qədim sivilizasiyaların meydana gəlməsindən bugünkü hakim kral sülaləsinədək keçdiyi tarixi, coğrafi xüsusiyyəti, iordaniyalıların milli-adət ənənələri, zaman-zaman bu ərazilərə pənah gətirmiş etnik azlıqlar, tarixi abidələr və s. haqqında oxucuda geniş təsəvvür yaratmağa müvəffəq olub.

Kitabın ərsəyə gəlməsi üçün dörd il ərzində İordaniyanı qarış-qarış gəzdiyini, təbii gözəlliklər və tarixi-mədəni-dini abidələrlə tanış olduğunu, yaşlı nəsil və bədəvi tayfalarının nümayəndələri ilə söhbətlər apararaq İordaniya xalqı, adət-ənənələri haqda məlumat topladığını söyləyən xanım E. Araslı kitabının adını təsadüfi qoymadığını, bu adın onun İordaniyaya və onun dost xalqına münasibətdə keçirdiyi səmimi hisslərlə bağlı olduğunu öz kitabında qeyd edib.

Əsərin ərəb dilinə tərcüməsi İordaniyanın Mədəniyyət Nazirliyi və İordaniya-Azərbaycan Dostluq Cəmiyyətinin təşəbbüsü və maliyyə dəstəyi ilə baş tutub. İordaniyanın mədəniyyət naziri Cureys Səmavi kitaba ön söz yazıb.

Kitabın yaxın vaxtlarda İordaniya ictimaiyyətinə geniş şəkildə təqdimatı və onun ingilis dilinə tərcüməsi nəzərdə tutulur.