Bu gündən etibarən Qətər Hava Yolları (QHY) cədvəl üzrə Azərbaycana uçuşlar həyata keçirməyə başlayır.

SalamNews-un verdiyi xəbərə görə, bununla əlaqədar keçirilən tədbirdə Qətər Hava Yollarının baş direktoru Əkbər Əl Bəkir bildirib ki, bu, şirkətin 2013-cü ildə dünya üzrə uçuş istiqamətlərinin genişləndirilməsi proqramının başlanğıcı deməkdir. Bakıya həyata keçiriləcək gündəlik və fasiləsiz uçuşlar həm də Qətər Hava Yolları (QHY) üçün Avropada ən yeni dayanacaq kimi qəbul edilir. Sözügedən reysin Tiflisə qədər davam etməklə Avropa şəhərləri istiqamətində uçuşların sayı 29-a çatacaq.

Əl Bəkir vurğulayıb ki, Azərbaycanın zəngin enerji resursları və sürətlə inkişaf edən turizm sahəsi QHY-nin Bakıya uçuşların təşkil olunması qərarında böyük əhəmiyyət daşıyıb.

İcraçı direktor açılış rəmzi hesab edilən QR 976 saylı reyslə Azərbaycanın Qətər dövlətindəki səfiri Eldar Səlimov, o cümlədən Beynəlxalq media və hava yollarının təmsilçiləri daxil olmaqla yüksək səviyyəli nümayəndə heyətinin tərkibində Bakıya təşrif buyurduğunu deyib.