“Türkiyənin əhval-ruhiyyəsi ilə oynamaq olmaz. Bu, Avropaya, eyni zamanda Gürcüstana da ziyan verə bilər”.

APA-nın Gürcüstan bürosunun xəbərinə görə, bu sözləri Gürcüstan parlamentinin sədr müavini, xristian-demokratlar fraksiyasının deputatı Levan Vepxvadze Fransa Senatının uydurma “erməni soyqırımı”nı inkar edənlərin cəzalandırılması haqqında qanun qəbul etməsinə münasibət bildirərkən deyib. O qeyd edib ki, belə məsələlərə ehtiyatla yanaşmaq lazımdır: “Müasir dövrün nəbzini tutmaq və ona uyğun qərarlar qəbul etmək lazımdır”.

L. Vepxvadze Qərbə istiqamətlənmiş bir çox beynəlxalq layihənin Türkiyədən keçdiyini xatırladıb: “Avropa idxal etdiyi yanacağı diversifikasiya etməlidir. Bildiyimiz kimi, Avropanın böyük hissəsi indi Rusiyadan gələn neft-qaz kəmərlərindən çox asılıdır. Orta Asiyadan, Xəzər regionundan gələn kəmərlər isə Türkiyədən keçir və keçəcək. Gələcəkdə Türkiyə daha da inkişaf edəcək. Ona görə də ciddi düşünmək lazımdır”.