Parlamentində belə bir qanun qəbul etmiş ölkənin necə vasitəçi olacağını Türkiyə Minsk Qrupunun üzvü olaraq soruşacaq

“Fransanın ATƏT-in Minsk Qrupunun üzvlüyündən çıxarılmasının artıq müzakirə edilməsi lazımdır”.

APA-nın Türkiyə KİV-lərinə istinadən verdiyi məlumata görə, bunu «CNN Türk» telekanalında Türkiyənin xarici işlər naziri Əhməd Davudoğlu bildirib. O vurğulayıb ki, Dağlıq Qarabağ problemi ilə bağlı 1992-ci ildə yaradılmış və Türkiyənin də yer aldığı Minsk Qrupunda ABŞ, Fransa və Rusiya həmsədrlik edir.

«Azərbaycan-Ermənistan münaqişəsindən təsirlənən iki millət varsa biri ruslar, o biri türklərdir. Türkiyə bu prosesin içində olmayacaq, amma Fransa olacaq. Sonra da Fransa prezidenti Ermənistana gedəcək. Sarkozi iki gün Ermənistanda, bir neçə saat isə Azərbaycanda qaldı. Çox açıq bir şəkildə tərəf tutduğunu göstərdi. Türk torpaqlarına dönüb həddi olmadan Ağrı dağını göstərəcək, sonra da bərabərhüquqlu həmsədr olaraq münaqişənin həlli yolunu axtaracaq. Mən vasitəçi missiyasını yerinə yetirmiş insan olaraq söyləyirəm, Fransanın belə bir missiyanı yerinə yetirməsi mümkün deyil», - deyə Davudoğlu vurğulayıb.

Xarici işlər naziri bu məsələnin Türkiyə tərəfindən müzakirəyə çıxarılacağını deyib: “Parlamentində belə bir qanun qəbul etmiş ölkənin necə vasitəçi olacağını Türkiyə Minsk Qrupunun üzvü olaraq soruşacaq. Sonra da torpaqlarının 20%-i işğal edilmiş olan qardaş Azərbaycanın hüququ adına bunu soruşacaq. Artıq bunu müzakirə etməyimiz lazımdır. Ya Türkiyə o masada həmsədrlər arasında olmalı, ya da Fransa da olmamalıdır. Bizim Türkiyə olaraq mövqeyimiz budur».