Bakıda səfərdə olan ATƏT-in fəaliyyətdə olan sədrinin Cənubi Qafqaz üzrə xüsusi nümayəndəsi Pedreyk Mörfi bu gün Azərbaycanın Xarici İşlər Nazirliyində Fransa senatında qondarma erməni soyqırımını inkar edənlərə qarşı cəzanı nəzərdə tutan qanun layihəsinin qəbulu məsələsini də müzakirə edəcək.

Bunu SalamNews-a açıqlamasında ATƏT-in Bakı ofisinin rəhbəri, səfir Koray Tarqay bildirib.

O vurğulayıb ki, Pedreyk Mörfi bu gün Azərbaycanın xarici işlər nazirinin müavinləri – Araz Əzimov və Mahmud Məmmədquliyev ilə görüşəcək. Görüşlərdə regiondakı mövcud və Dağlıq Qarabağ münaqişəsinin nizamlanması prosesindəki son vəziyyətlə bağlı məsələlər müzakirə olunacaq, həmçinin Fransa Senatının məlum qərarının müzakirəsi gözlənilir.

Diplomat söyləyib ki, ATƏT-in xüsusi nümayəndəsi bu gün Azərbaycanın müdafiə naziri və “Dağlıq Qarabağın Azərbaycanlı İcması” İctimai Birliyinin nümayəndələri ilə də görüşəcək.

Xatırladaq ki, ATƏT-in fəaliyyətdə olan sədrinin Cənubi Qafqaz üzrə xüsusi nümayəndəsi Pedreyk Mörfi Bakıya səfərə yanvarın 26-da axşam gəlib. Bundan əvvəl, Pedreyk Mörfi Ermənistanda bir sıra görüşlər keçirib.