"Fransa Senatının qondarma erməni soyqırımını inkar edənlərin cəzalandırılmasını nəzərdə tutan qanun layihəsini qəbul etməsi Azərbaycan hakimiyyəti üçün böyük təəssüf hissi doğurur". Bunu SalamNews-a Azərbaycan Prezidenti Administrasiyasının (PA) Siyasi təhlil və informasiya təminatı şöbəsinin müdiri Elnur Aslanov bildirib.

O vurğulayıb ki, qanun layihəsinin qəbulu Fransanın “demokratik ruhu” və mahiyyəti ilə ziddiyyət təşkil edir. Bu qanun nə hüquqi baxımdan, nə də mənəvi baxımdan əsaslandırılması mümkün olmayan, yalnız hakim partiyanın və erməni lobbisinin təsiri altında olan senatorların qərəzli fəaliyyətinin nəticəsi kimi səciyyələndirilə bilər.

Şöbə müdiri deyib: "Bu qanunun Fransa Konstitusiyası ilə ziddiyyət təşkil etməsi riski olduğuna görə, onun Konstitusiya Məhkəməsi tərəfindən ləğvi mümkündür. Bu qanun hakimiyyətlərin bölgüsü prinsipinə ziddir, qanunverici hakimiyyət hakim rolunu oynaya bilməz, qanunverici orqan özünün bayağılaşdırılmasına gətirib çıxaracaq hər hansı istənilən məsələ ilə bağlı sənəd qəbul edə bilməz. Qanunun icrasını təmin edən hakimlər nəyin əsasında cinayət tərkibini müəyyənləşdirəcəklər?! Çünki iddia olunan soyqırımla bağlı heç bir beynəlxalq sənəd yoxdur”.

Onun sözlərinə görə, Senatın qərarı demokratik prinsiplərin və fundamental insan azadlıqları ilə ziddiyyət təşkil edir. İnsan hüquqlarına dair Beynəlxalq Bəyannamənin 19-cu maddəsinə, Avropa İnsan Hüquqları Konvensiyasının 10-cu maddəsinə uyğun olaraq, insan fikir və düşüncəsini azad şəkildə ifadə etmək hüququna malikdir və bu hüququn təminatı Fransa Konstitusiyasında əksini tapıb: “Bu qanun elm adamlarının azad şəkildə tədqiqat aparmasına mane olur, onların obyektiv tarixi məlumatları mənbələrdə olduğu kimi, təhlil etmək əvəzinə, qanunun mahiyyətinə uyğun olaraq susmalarına gətirib çıxaracaq. Özünü insan hüquqlarının beşiyi sayan Fransada belə bir qanunun qəbulu təəssüf doğurur. Məsələyə rasional yanaşma,- Türkiyə tərəfinin təklif etdiyi kimi, onun tarixçilər tərəfindən araşdırılmasını zəruri edir. Lakin erməni tərəfi hər zaman bu ideyadan qaçıb, tarixi sənədləri və faktları arxivdə saxlamağa üstünlük verib”.

PA rəsmisi bildirib ki, Fransa Senatının bu qərarı Cənubi Qafqazda ictimi-siyasi vəziyyəti daha da gərginləşdirir. Türkiyə və Ermənistan arasında münasibətlərin normallaşması dialoq və konstruktiv mövqe tutmağı tələb edir. Azərbaycan qondarma erməni soyqırımı məsələsində hər zaman Türkiyənin mövqeyini dəstəkləyib və onun yanında olub. Bu, Azərbaycanın prinsipal mövqeyidir və bu mövqə dəyişilməzdir. Tarixi hadisələrə “siyasi” və “diskriminativ” yanaşma qeyri məqbuldur.

E.Aslanov deyib: "Ermənilər yaxın tarixdə Xocalıda dinc azərbaycanlıların soyqırımını törədiblər. Fransa parlamenti Xocalı soyqırımına hüquqi qiymət verməlidir. Fransa senatı yüz il bundan əvvəl baş vermiş, sübuta yetirilməmiş və tarixçilərin araşdırdığı bir məsələni indi gündəmə gətirir. Yaxşı olardı ki, Fransa sübuta yetirilməmiş bir hadisəni mühakimə etməyin əvəzinə, 20 il bundan əvvəl baş verən Xocalı soyqırımına mövqe bildirsin, ədalətli və hüquqi qiymət versin. Əgər doğurdan da fransız senatorlar belə həqiqət carçısıdırlarsa, Xocalı hadisəsinə qiymət versinlər. Fransa Senatının qəbul etdiyi qərar araşdırma, tədqiqat azadlığı, söz azadlığına zərbədir. Sabah tədqiqat aparmaq istəyənlər nə edəcəklər. Bu qanun onların azadlığını əllərindən alır. Bu baxımdan Fransa Senatının qərarını pisləyirik, əsassız sayırıq”.