Türkiyə XİN Fransa senatında qəbul edilən, qondarma “erməni soyqırımı"nı inkar edənlərə cəza verilməsini nəzərdə tutan qanun layihəsinə kəskin etirazını bildirib.

XİN qanunun qəbulunun belə həssas bir məsələnin Fransanın daxili siyasət hesablarına alət edildiyini göstərdiyini vurğulayıb. «Bu, Fransa siyasəti üçün son dərəcə uğursuz bir addımdır. Tarixin və ədalət anlayışının, başqa xalqların keçmişləri üzərindən siyasiləşdirilməsi, ifadə azadlığının bu qədər məsuliyyətsizcəsinə zədələnməsi ilk növbədə Fransa baxımından bir itkidir».

XİN birtərəfli mövqe tutaraq tarixi hadisələri şərh edən, başqa xalqları ittiham edən, beynəlxalq hüququn əsaslarına əhəmiyyət verməyərək soyqırımı kimi ciddi bir cinayət üzrə hökm çıxaran fransız siyasətçilərinin mövqelərinə heç cür haqq qazandırılmasının mümkün olmadığını bildirib: «Heç bir ölkə parlamentinin nə belə bir haqqı, nə də ixtiyarı var. Alınan qərar bununla qalmayıb, ifadə azadlığı və elmi araşdırma azadlığına zərbə vurub».

Xarici siyasət idarəsi edilən bütün cəhdlərə və xəbərdarlıqlara, aparıcı fransız qurum və hüquqşünaslarının mövqelərinə rəğmən Türkiyə ilə Fransa arasındakı tarixi və çoxtərəfli əlaqələrin daxili siyasətə qurban edilməsindən təəssüf duyduğunu bəyan edib: «Bunun məsuliyyətinin kimə aid olduğu məlumdur».

XİN qanunun qüvvəyə minməsi halında əvvəlcədən düşünülmüş tədbirlərin həyata keçiriləcəyini bir daha xatırladıb. Nazirlik yersiz iddialara qarşı müdafiənin davam etdiriləcəyini də bəyan edib.

«Türkiyə, təməl insani dəyərlər və ictimai fikirlə hesablaşmayan bu haqsız qərara qarşı lazımi hər cür addımı atmaq niyyətində qərarlıdır», deyə bəyanatda bildirilir.