Rəcəb Tayyib Ərdoğan: “Türkiyə böyük dövlətə xas şəkildə vüqarlı davranacaq”

“Fransada qəbul olunan qanunun bizim üçün heç bir əhəmiyyəti yoxdur, bizim üçün tamamilə yox qismindədir. Orta əsr təfəkkürünü xortladan bu qanun hər şeydən əvvəl Avropa dəyərlərini ayaqlar altına salır. Bu mövzuda biz söyləyəcəklərimizi söylədik, xəbərdarlıqlarımızı etdik. Qanunun əleyhinə səs vermiş senatorlar Konstitusiya Məhkəməsinə müraciət etməyə hazırlaşır. Bu xətanın düzəldiləcəyinə olan ümidimizi hələ itirməmişik”. APA-nın xəbərinə görə, bu sözləri Türkiyənin baş naziri Rəcəb Tayyib Ərdoğan rəhbərlik etdiyi Ədalət və İnkişaf Partiyasının (AKP) parlament fraksiyasının toplantısındakı çıxışında deyib.

R. T. Ərdoğan Fransa prezidenti Nikola Sarkozinin Türkiyə ilə mübahisələrdən siyasi xal toplamasına əsas yaratmayacaqlarını söyləyib: “Bu qanun açıq-aşkar ayrı-seçkilik və irqçilikdir, fikir azadlığını öldürən və Türkiyəyə qarşı düşmənçilik üzərində qurulmuş səs toplama kampaniyasıdır, Fransa və Avropa tarixinə haqsızlıqdır. Buna səssiz qalanlar, susanlar Avropada faşizmin dirçəlişinə göz yummaq kimi bir günaha girirlər. Fransa parlamentinin rasional düşüncəli üzvlərinə, fransız intellektuallarına, Fransa ictimaiyyətinə səslənirəm: Bu, Türkiyə-Fransa məsələsi deyil, Fransa-Ermənistan məsələsi deyil. Bu, açıq şəkildə diskriminasiyadır, irqçilikdir”.

R. T. Ərdoğan N. Sarkozinin babasının Osmanlı İmperiyasının tabeliyindəki Saloniki (indiki Yunanıstan) şəhərində doğulub böyüməsi, ulu babasının isə İspaniyadan qovulan və Osmanlının qucaq açdığı bir yəhudi olması faktının ironik olduğunu söyləyib: “Kökü Osmanlıya qədər gedən bir şəxs nə qədər düşmənçilik edərsə etsin, Osmanlı tolerantlığına kölgə sala bilməz”.

Baş nazir Türkiyənin çığır-bağır salmayacağını, böyük dövlətə xas şəkildə vüqarlı davranacağını vurğulayıb: “Mərhələ-mərhələ, geri addım atmadan nəzərdə tutduğumuz sanksiyaları tətbiq edəcəyik. Hələ səbr edirik, baş verənləri izləyirik. Lazımi qərarlar qəbul edib, sanksiya planımızı ictimaiyyətə açıqlayacağıq”.