"Mən xristianam və İncilə and içmişəm"

ABŞ-da Demokrat Partiyasından prezidentliyə ən şanslı namizədlərdən biri, qaradərili senator Barak Obama müsəlman olması və bunu gizlətdiyi haqda iddialara münasibət bildirib. "MSNBC" telekanalıan müsahibəsində Obama deyib ki, onun atası keniyalı müsəlman olsa da, özü xristiandır və bu iddialar onun reytinqini aşağı salmaq üçün ortaya atılıb.

Xatırladaq ki, Amerika mətbuatında Barak Obamanın atasının dinini qəbul etdiyi və bunu gizlətdiyi haqda məlumatlar yer alırdı. İddia olunurdu ki, Obama prezident seçilsə, Konqresdə İncilə yox, Qurana and içəcək. O da bildirilirdi ki, Obama uşaq yaşlarında İndoneziyada yaşayarkən bu ölkədə mədrəsə təhsili alıb.
"Mən qətiyyətlə bunu deyirəm ki, xristianam. Senatorluq andını da İncilə əl basaraq içmişəm" - deyə Obama bildirib. Xəbər verildiyi kimi, Obamanın əsl adı Barak Hüseyn Obamadır, onun atası keniyalı, anası isə ağdərili amerikalıdır. Obama 2 yaşında olarkən atası ilə anası boşanıb və kişi Keniyaya dönüb. Sonra Obamanın anası indoneziyalı tələbəyə ərə gedib və gələcək prezidentliyə namizəd atalığı və anası ilə birlikdə bir neçə il İndoneziyada yaşayıb. Sonradan ABŞ-a dönüb və anasının valideynlərinin yanında yaşamağa başlayıb.