CHP lideri Kamal Kılıçdaroğlu, İtaliyada nəşr edilən "Limes" jurnalının əməkdaşı Yasemin Taşkının suallarını cavablandırıb.

SalamNews-un "Ankara" agentliyinə istinadla verdiyi xəbərə görə, Türkiyənin aparıcı rola sahib aktyora çevrilməsini arzu etdiklərini bildirən CHP sədri deyib: "Türkiyənin geosiyasi mövqeyinə görə əhəmiyyətli rola sahib olma haqqı var. Bundan başqa, Türkiyə bölgənin problemlərinin həllinə, insan hüquqlarının inkişafına və demokratiyaya töhfə verə bilər. Bunlar Türkiyənin əsas vəzifələri olmalıdır. Ancaq yaşamaqda olduğumuz hadisələr göstərir ki, Türkiyə bölgədəki anlaşılmazlıqları həll etməkdə çətinlik çəkir. Suriya ilə sərt ziddiyətlərimiz mövcuddur, eyni şey İsrailə də aiddir, Azərbaycan ilə əlaqələr və Ermənistanla sərhəd problemləri narahatedicidir".

Türkiyənin xarici siyasətinin böyük güclər tərəfindən yönləndirildiyini söyləyən Kılıçdaroğlu, belə davam edib: "Yaxın Şərq enerji qaynaqları baxımından zəngin bir bölgədir. Böyük qüvvələr bölgədə öz hökmranlıqlarını qurmaq üçün Türkiyədən istifadə edirlər. Biz, CHP (Cümhuriyyət Xalq Partiyası) olaraq buna qarşı çıxırıq. Biz bölgənin insan hüquqları, demokratiya baxımından inkişaf etməsini istəyirik. Lakin bölgəyə bu dəyərləri gətirmək üçün döyüş üsulundan istifadə etmək doğru deyil. Məsələn, İraqı nümunə göstərmək olar. Demokratiyanın qurulması lazım idi, ancaq ölkə bölündü. İndi eyni üsulu başqa ölkələr üçün də tətbiq etmək istəyirlər. Uduzan hər zaman yoxsulluq və təzyiqə məruz qalan Yaxın Şərq xalqları olub. Bölgəyə demokratiya, azadlıq və hüquq gətirmək üçün müxtəlif yollardan istifadə edilməlidir. Problemlərin həll edilməsi üçün bölgə xalqları arasındakı əlaqələr gücləndirilməlidir".

"Qərbin güclü dövlətlərindən söz açarkən yalnız Amerika Birləşmiş Ştatlarını nəzərdə tutursunuz" sualına CHP sədri belə cavab verib: "Yalnız Amerika deyil. Şimali Afrikada bəzi Avropa İttifaqı ölkələrinin ifa etdikləri rolu gördük. Liviyaya ilk hərbi təyyarələrini Fransa göndərdi. Hərbi müdaxilələr BMT-nin qərarından əvvəl reallaşdırıldı. Bu isə doğru deyildi. Amerika dünyanın böyük gücü olsa da, yalnız onu nəzərdə tutumuram".