Vaşinqtonda yerləşən Strateji və Beynəlxalq Araşdırmalar Mərkəzinin (CSIS) Qafqaz və Avropa ölkələri üzrə analitikləri Obama administrasiyasına 2012-ci ildə Qafqaz regionuna daha çox diqqət ayırmağı məsləhət görürlər.

APA-nın Vaşinqton müxbirinin xəbərinə görə, CSIS-in Yeni Avropa Demokratiyaları Layihəsinin direktoru Yanuş Buqayski deyib ki, Ağ Ev 2012-ci ildə Azərbaycan, Gürcüstan və Ermənistanla əlaqələrin inkişafı üçün yaranan imkanları diqqətdən kənarda qoymamalıdır: “ABŞ Belarus və Ukraynanın müstəqilliklərini dəstəkləməli və bu iki ölkədə gözlənilən siyasi çaxnaşmalara da hazır olmalıdır”.

Analitikin fikrincə, Vladimir Putin kütləvi etirazların qarşısını almaq və özünün avtoritar metodlarına haqq qazandırmaq məqsədilə milli və imperialist hissləri səfərbər etməyə çalışsa, onun Kremlə qayıdışı Rusiyanı qonşuları ilə yeni münaqişələrə sürükləyəcək. Y. Buqayski bildirib ki, Moskvanın təhdidlərinə baxmayaraq, Vaşinqton Mərkəzi-Şərqi Avropada raketdən müdafiə proqramını və NATO üzvləri ilə hərbi əlaqələrini inkişaf etdirməlidir.

Digər bir analitik, Avropa Proqramının direktoru Hizer Konli isə xatırladıb ki, 2012-ci ildə Sovet İttifaqının dağılmasının 20 illiyi qeyd olunacaq: “Son iyirmi ildə Rusiya keçmiş Sovet İttifaqı ərazisindəki ölkələri yenidən birləşdirmək üçün təzyiq, ticarət və hərbi əməkdaşlıq kimi ənənəvi metodlarından istifadə edib. Amma illər ötdükcə Rusiyanın öz birliyi pozulub və nüfuzu azalıb”.

Analitikləri narahat edən bir məsələ də odur ki, Avropanın vahid valyuta və müdafiə sistemi yaratmaq səyləri Rusiyadakı kimi iflasa uğrayır: “Strateji prinsiplər nöqteyi-nəzərindən keçmişə baxdıqda görmək olar ki, Avropa və Avrasiya gələcəyə pis hazırlaşıblar. Əgər ABŞ Avropadakı aparıcı rolunu bərpa etməsə, biz Avropada və Avrasiyada bir-birinin ardınca böhranların və yeni münasibətlərin şahidi olacağıq, ABŞ isə artıq bu münasibətlərə təsir edə bilməyəcək”.