Əgər Fransa parlamentində qondarma erməni soyqırımını inkar edənlərə qarşı cəzaların tətbiqinə icazə verən təklif təsdiq edilərsə, o zaman Azərbaycan tərəfi də buna adekvat addımlar atacaq. Bunu SalamNews-a açıqlamasında Böyük Quruluş Partiyasının sədri, Milli Məclisin İnsan hüquqları komitəsinin üzvü Fazil Mustafa bildirib.

Deputat vurğulayıb ki, sözügedən təklif təsdiq edilərsə, o zaman Azərbaycanın Milli Məclisi də Xocalı soyqırımını inkar edənlərə qarşı cəza müəyyən edən müvafiq qanunu qəbul edəcək. F.Mustafa deyib: “Bu qanun da Azərbaycanda əsasən fransızlara şamil ediləcək. Biz bunu təşkil edəcəyik və hər hansı Fransa vətəndaşı ölkəmizdə olarkən Xocalı soyqırımını inkar edən ifadə işlədərsə, dərhal həmin şəxsin həbsi məsələsi gündəmə gələcək. Bu qanun Azərbaycanda istənilən vətəndaşa şamil olunacaq”.

Partiya sədri söyləyib ki, əgər Fransa parlamenti qondarma erməni soyqırımı ilə bağlı təklifi təsdiq edərsə, o zaman Azərbaycan tərəfi eyni addımın atılması ilə bağlı Türkiyə parlamentinə də müvafiq təklif göndərəcək.