Los Anceles şəhərinin ən böyük İspan dilli "La Opinion" qəzetinin redaktoru Qabriel Lerner Azərbaycana səfər etdikdən sonra "Los Angeles Jewish Journal"-da "Azərbaycan yəhudiləri: əsirlərlə bir yerdə yaşamağın nümunəsi" adlı məqalə dərc etdirib.

APA-nın ABŞ bürosunun məlumatına görə, məqalədə digər ölkələrdən fərqli olaraq yəhudilərin Azərbaycanda yüksək səviyyədə təmsil olunduğu göstərilib. Müəllif yazıb ki, səkkiz milyonluq müsəlman dövləti olan Azərbaycanda 12 minə yaxın yəhudi, xüsusilə Quba yəhudiləri yaxşı tanınırlar. Qabriel Lerner Qubanın yəhudi qəbiristanlığının səliqə-sahman içində olduğunu, yəhudilərin isə dəbdəbəli evlərdə yaşadıqlarını qeyd edib. Azərbaycan Milli Məclisinin üzvü Yevda Abramovla görüşən müəllif deputata istinadən yazıb ki, Azərbaycanda yaşayan yəhudi din adamlarından qəssablarına kimi hamısı İsraildə yaxşı təhsil alıb. Millət vəkili Azərbaycanın dini tolerantlığa görə dünyanın ən liberal ölkəsi olduğunu, Ermənistanda heç 10 yəhudi ailəsinin qalmadığını da vurğulayıb. Y. Abramov "Dağlıq Qarabağ uğrunda müharibə başlayarsa, çoxlu sayda yəhudi şəhid olmağa razıdır", - deyə bildirib. O, birinci Qarabağ müharibəsində şəhid olan ilk milli qəhrəmanlar arasında yəhudi Albert Aqarunovun da olduğunu əlavə edib. Yevda Abramov ABŞ jurnalistinə Quba yaxınlığında aşkarlanan və 1918-ci ildə ermənilərin törətdiyi vəhşiliyin sübutu olan kütləvi qəbiristanlığı da göstərib. İsrailin ölkəmizdəki səfiri Artur Lenk də Azərbaycanın müsəlman dövlətlər arasında nümunə olduğunu söyləyib. Səfir iqtisadi, siyasi və mədəni əlaqələrdə iki dövlətin çox yaxın olduğunu və İsrailin neftə olan tələbatının altıda birinin məhz Azərbaycanın hesabına təmin edildiyini deyib. Jurnalist məqalədə Dağlıq Qarabağ münaqişəsinə toxunaraq, bir milyon azərbaycanlının erməni təcavüzü nəticəsində məcburi köçkünə çevrildiyini bildirib.
Qeyd edək ki, 150 minlik tirajla çıxan "Los Angeles Jewish Journal" Azərbaycanla bağlı artıq 2-ci məqaləni dərc edir. Birinci məqalə isə Azərbaycanın Los Angeles şəhərindəkı baş konsulu Elin Süleymanovla müsahibə olub. /APA/