Bu gündən Məhərrəm ayı başlayır və Səfər ayı da daxil olmaqla mərasim martın 8-də başa çatacaq.

Qafqaz Müsəlmanları İdarəsi mətbuat xidmətinin rəhbəri Hacı Akif bildirib ki, bu ayın başlanması ilə bağlı idarənin Qazilər Şurası fitva verib: "Bu ay haqqında danışarkən əsas məqsəd insanlarda vətənə, torpağa bağlılığın, onu qorumaq uğrunda səfərbər olmağın təbliğatıdır. Bu ay ərzində Kərbəla müsibətini yad etməklə insanlarda bədbinlik, ruh düşkünlüyü yaratmaq lazım deyil. Elə Qazilər Şurasının verdiyi fitvada da bu barədə danışılır".

Məhərrəm ayının başlanması ilə bağlı bu gün məscidlərdə xüsusi mərasim keçirilməyəcək. Hacı Akifin sözlərinə görə, amma xütbələrdə, moizələrdə bu ayın mahiyyəti haqqında fikirlər səsləndirilməli, dualar oxunmalıdır: "Bütün əsas mərasimlər aşura günü yerinə yetiriləcək. Bu il aşura günü yanvarın 19-na düşür. Bu isə Azərbaycanın müstəqilliyi uğrunda şəhid olmuş vətən oğullarının xatirəsinin anıldığı gündür və biz bu günlərdə Kərbəla şəhidləri ilə birgə 20 Yanvar şəhidlərinin, Qarabağ uğrunda döyüşlərdə şəhid olan həmvətənlərimizin xatirəsini də yad edəcəyik".

Hacı Akifin sözlərinə görə, Qazilər Şurası aşura günü bütün müsəlmanları qanvermə aksiyasında fəal iştirak etməyə çağırır: "Bu aksiya bir neçə məsciddə reallaşacaq. Bu hələ dəqiq deyil, amma aksiyaların İçəri Şəhərdəki məsciddə, Əjdərbəy məscidində və Soltanəli məscidində olacağı təxmin edilir. Bildiyinizə görə, Təzə Pir məscidində təmir işləri getdiyinə görə bu il orada heç bir mərasim reallaşmayacaq".