ABŞ Prezidenti Barak Obama İrana qarşı əlavə sanksiyaların tətbiq edilməsini nəzərdə tutan qanun layihəsini imzalayıb.

SalamNews BBC-yə istinadən məlumat verir ki, yeni qanuna əsasən, İranın Mərkəzi Bankı ilə əməkdaşlığı davam etdirəcək xarici şirkətlərin ABŞ-ın maliyyə sisteminə çıxışı bağlanacaq.

Obama qeyd edib ki, o, qəbul edilmiş qanunun ayrı-ayrı müddəaları ilə razı deyil. Bu müddəalar terrorizmdə şübhəli bilinən əcnəbi vətəndaşlara qarşı addımlarla bağlıdır. "Bu qanunu imzalamağım onun bütün müddəaları ilə razı olmağım anlamına gəlmir" , - Obama bəyan edib.

ABŞ prezidenti qanun layihəsini məzuniyyətdə olduğu Havay adalarında imzalayıb. Yeni qanun İranın nüvə proqramı ilə bağlı gərginliyin güclənməsi fonunda qəbul edilib. ABŞ və bir sıra Qərb ölkələri İranı dinc nüvə proqramı adı altında nüvə silahı hazırlamaqda günahlandırırılar. Tehran bütün ittihamları rədd edərək bəyan edir ki, onun nüvə proqramı ölkənin elektrik enerjisinə olan tələbatının ödənilməsinə yönəldilib.

Bir neçə həftə əvvəl ABŞ İranın maaliyyə sisteminə qarşı yönəldilmiş sanksiyalar tətbiq edib, lakin onlar birbaşa Mərkəzi Banka aid olmayıb.