Dünyanın ən iri sığorta şirkəti "Lloyd’s of London" İslam qanunlarına uyğun sığorta məhsullarının satışına başlamaq niyyətindədir. Bu barədə "Lloyd’s"un Direktorlar Şurasının sədri Piter Levin bəyan edib.

P.Levinin sözlərinə görə, "Lloyd’s" hazırda "Təkafül" adı ilə tanınan İslam sığortası bazarına çıxışın imkanlarını araşdırır. P.Levin qeyd edib ki, "Lloyd’s" üçün ən iri bazar olan ABŞ-la müqayisədə Yaxın Şərq, Çin və Braziliyanın inkişaf perspektivləri daha genişdir.
Qeyd edək ki, son 5 il ərzində İslam sığortası bazarının orta illik artım tempi 24% təşkil edib. "Təkafül"un sığorta mükafatları ildə orta hesabla 40% artır, halbuki 2005-ci ildə dünya üzrə artım 2,5%-ə bərabər olub. "Təkafül"a tələbatın artması neftin qiymətinin rekord səviyyəyə çatması ilə bağlıdır.
Xatırladaq ki, "American International Group", "Allianz" və "Swiss Reinsurance" sığorta şirkətləri artıq "Təkafül" sığorta məhsullarının satışına başlayıb. Proqnozlara əsasən, dünya İslam sığortası bazarı 2015-ci ilin sonuna kimi 5 dəfə artaraq 14 mlrd. ABŞ dollarına çata bilər.