“Ermənilər və bu cür vandallar anlamalıdırlar ki, kərpic və ya divar dağıtmaqla qalanı məhv etmək olmaz. Artıq informasiya əsridir. Biz sübut edirik ki, İrəvan qalası türk-müsəlman memarlıq abidəsi kimi 500 il əvvəl inşa edilib. Lakin ermənilər bu qalanı dağıdıblar. Hətta bir daş belə saxlamayıblar”.

APA-nın məlumatına görə, bu açıqlamanı jurnalistlərə Prezident Administrasiyasının ictimai-siyasi məsələlər şöbəsinin sektor müdiri Fuad Axundov verib.

F. Axundov bildirib ki, 1511-ci ildə Azərbaycan Səfəvilər dövlətinin başçısı Şah İsmayıl Xətainin əmri ilə inşa edilən qala 20-ci əsrin əvvəllərindən başlayaraq, Ermənistan hökuməti tərəfindən dağıdılıb: “Əsas məqam odur ki, qalanın mövcudluğunu və burada vandalizm aktı törədildiyini təsdiqləyən sübutlarımız var. Qalanın mövcudluğunu sübut edən şəkillər aşkar edilib. Xarici ölkələrin arxivlərindən tapılan bu şəkillər vandalizmin sübutu kimi dünyaya təqdim ediləcək”.

F. Axundov qalanın mövcudluğunu şübhə altına alan erməni alimlərinə isə tövsiyə verib: “Ermənilər bu hərəkətləri ilə özlərini gülünc yerinə qoyurlar. Mən İrəvan şəhərinin – qalasının taleyini İtaliyanın Pompey şəhərinə bənzədirəm. Lakin burada fərqlilik də mövcuddur. Pompey şəhəri 20 əsrdir öz simasını qoruyub saxlaya bilib. Pompey vulkan püskürdükdən sonra 17 əsr torpağın altında qalıb. Lakin italyanlar bu şəhəri aşkara çıxarıb. Ancaq qədim Azərbaycan şəhəri olan İrəvan isə öz simasını tamamilə dəyişib. Biz bunu sübuta yetiririk ki, bu şəhər təkamül nəticəsində simasını dəyişməyib. Xarici qonaqlar da bunu müşahidə edirlər. Onlar sual verirlər ki, nəyə görə, köhnə Bakı, Tiflis var, lakin qədim İrəvan qalası yoxdur? Mən isə deyirəm, əgər Yerevan qədim erməni şəhərdirsə, niyə görə, şəhərin qədim hissəsi yoxdur? Bu sualın isə bir cavabı var. Rusiyanın işğalının davamı olaraq Ermənistan Respublikası qurulandan sonra İrəvan şəhərini - qalasını darmadağın ediblər. Çünki İrəvan qalası ermənilərə doğma olmayan, onlara yad memarlıq abidəsi üslubunda inşa edilib. Bu memarlıq nümunələri göstərir ki, bu ərazilər ermənilərə məxsus deyil və həmin millət o ərazilərə sonradan köçmədir. Qədim şəhərin yerlə yeksan edilməsi isə vəhşilikdir”.

F. Axundov əlavə edib ki, dünyanın bütün insan yaşayan tarixi məskənlərində şəhərlər iki hissədən ibarət olub: “Şəhərlər əvvəlcə qalalardan ibarət olub, sonradan isə şəhərlər inkişaf edilib. Lakin qala bu şəhərlərin ürəyi olaraq qalıb. Ermənistandakı şəhərlərin heç birində qala mövcud deyil. Bu da ermənilərin vəhşiliyinin bir sübutudur”.