Növbəti illərdə Azərbaycandan həcc ziyarətinə gedəcək zəvvarlar üçün yalnız təyyarə variantının təklif olunması gözlənilir. APA-nın xəbərinə görə, bu barədə Qafqaz Müsəlmanları İdarəsinin (QMİ) sədri Hacı Allahşükür Paşazadə deyib. O, bildirib ki, artıq Türkiyə, Rusiya, İran və digər ölkələr zəvvarları Həcc ziyarətinə avtobusla göndərmirlər.

Məsələyə münasibət bildirən Nardaran ağsaqqalı Hacı Hacıağa Nuri “Deyerler.org”a açıqlamasında bunları deyib: “Bir çox müsəlman ölkələrində Həcc ziyarətinə avtobusla getmirlər. Bizdə istisna olaraq avtobusla gedirlər. Çünki avtobus ilə getmək daha ucuz başa gəlir. Avtobusun keçdiyi ölkələrdə indi vəziyyət gərgindir. Bu da təbii ki, narahatçılıq yaradır. Təyyarələrlə getmək təhlükəsizlik baxımından daha yaxşıdır. Təyyarələrin də iki qiymətdə olması daha yaxşı olardı. Bir qiymət orta təbəqə üçün, bir təbəqə isə daha imkanlı şəxslər üçün. Belə olsa orta təbəqəli insanlar da ziyarətə gedə bilərlər. Əgər iki qiymət olarsa, buna normal baxmaq olar”.deyerler.org