Azərbaycan Milli Məclisinin bugünkü iclasında "Təhsil haqqında" qanun layihəsi birinci oxunuşda müzakirəyə çıxarılıb. Layihə haqqında danışan Milli Məclisin Elm və təhsil daimi komissiyasının sədri Şəmsəddin Hacıyev bildirib ki, bu layihə Azərbaycanda təhsil sahəsinə aid çərçivə qanunu sayılacaq.

Bundan başqa, təhsillə bağlı daha 10-12 qanunun qəbulu nəzərdə tutulub. İndiyədək Azərbaycanda onlarla qanunsuz ali təhsil müəssisəsinin fəaliyyət göstərdiyini deyən komissiya sədri yeni qanunla belə halların qarşısının alınacağını bildirib. Milli Məclisin sədri Oqtay Əsədov uzun çıxış etməsini əsas gətirərək Ş. Hacıyevin sözünü kəsib və bundan sonra müzakirələr başlayıb. Layihənin qəbulunu Dağlıq Qarabağ problemi ilə müqayisə edən millət vəkili Zahid Oruc bildirib ki, Dağlıq Qarabağ probleminin həllinə qanunun qəbul olunmasından daha çox inanır. Layihədə nəzərdə tutulmuş 11.1.8-ci (Azərbaycan Respublikasının bütün təhsil müəssisələrində təhsil alanların, təhsil verənlərin və digər işçilərin baş örtüyündə (hicab, çadra və s.) və digər dini geyimlərdə gəlmələrinə yol verilmir" maddəyə toxunan deputat deyib ki, bu maddə qanun layihəsindən çıxarılmalıdır. Təhsildə ciddi islahatların aparıldığını qeyd edən millət vəkili Cəmil Həsənli bu sahədə çatışmazlıqların olduğunu da vurğulayıb. Əsas diqqəti korrupsiyaya yönəldən millət vəkilinin sözlərinə görə, Azərbaycanın təhsil müəssisələrində rüşvətxorluq halları var. O, təhsil işçilərinin maaşlarının artırılmasının vacib olduğunu deyib. Millət vəkili Siyavuş Novruzov əvvəlcə hicab məsələsinə toxunub: "Mən tələbələrin, şagirdlərin dərsə hicabla buraxılmasının əleyhinəyəm. Ancaq eyni zamanda bu maddənin qanundan çıxarılmasının tərəfdarıyam. Bu məsələ ali və orta məktəblərin rəhbərliyi səviyyəsində həll olunmalıdır. Qanunda göstərilib ki, orta məktəbi qızıl və gümüş medallarla bitirən şagirdlər ali məktəblərə birbaşa qəbul edilir. Bu çox anormaldır, heç kimin yadından çıxmayıb ki, medallar kimlərə verilirdi. Onu da deyim ki, bu ölkədə elmlər namizədinin, professorların sayı tələbələrdən çoxdur. Bu da düzgün deyil".
Deputatların çıxışına münasibət bildirən O. Əsədov hicabla bağlı maddənin qanundan çıxarılmasının tərəfdarı olduğunu söyləyib. Onun sözlərinə görə, bu məsələni Təhsil Nazirliyi müəyyənləşdirməlidir. Məsələyə kəskin münasibət bildirən Qüdrət Həsənquliyev isə bildirib ki, Azərbaycana xarici ölkələrindən din adı altında cəhalət idxal olunur. Deputatın fikrincə, maddənin layihədən çıxarılması Azərbaycanda dünyəvi dövlət tərəfdarlarının ən böyük məğlubiyyəti olar: "Uzağa getməyək, dini cəhətdən həssas olan yerlərə nəzər salaq. Məsələn, Nardaran demək olar ki, dövlətin nəzarətindən çıxıb. Azərbaycanın bəzi bölgələrində artıq qızları məktəbə göndərmirlər, 13-14 yaşında ərə verirlər. Təhsildə radikal islahatlar aparılmalıdır, dövlət təhsil müəssisələri özəlləşdirilməlidir".
Vitse-spiker Bahar Muradova bildirib ki, Azərbaycanda təhsilin dünyəvi olduğu qanunlarda göstərilib: "Bu məsələ hələ ki, müzakirə edilir, nəticəsi sonda məlum olacaq. Məncə, liberal dəyərlər qorunmalı, təhsildə ifratçılıq aradan qalxmalıdır".