Hazırda Milli Məclisin müzakirəsinə verilmiş "Təhsil haqqında" qanunun "Təhsilin məzmununa və təşkilinə dair ümumi tələblər" adlı 11-ci maddəsinin 1.8-ci bəndində deyilir: "Azərbaycan Respublikasında bütün təhsil müəssisələrinə təhsilaalanların, təhsilverənlərin və digər işçilərin baş örtüyündə (hicab, çadra və s.) və digər dini geyimlərdə gəlmələrinə yol verilmir".

"Təhsil haqqında" qanun layihəsində baş örtüyünə qarşı müddəanın yer alması insan haqlarına qarşı yönəlib". "Turan"ın məlumatına görə, Dini Etiqad və Vicdan Azadlığını Müdafiə Mərkəzinin (DEVAMM) müraciətində belə deyilir.

Müraciətdə qanun layihəsində nəzərdə tutulan bu maddənin ölkə konstitusiyasının insan haqlarını təmin edən maddələrilə ziddiyyət təşkil etdiyi bildirilir: "Layihənin bu redaksiyada qəbul olunması minlərlə insan və bütöv bir vətəndaş kəsiminin təhsil almaq, dini etiqadına uyğun görünüşə malik olmaq kimi hüquqlardan məhrum edilməsi deməkdir. Biz inanmaq istəyirik ki, sağlam düşüncə qalib gələcək və bu maddə bir anlaşılmazlıq olaraq aradan qaldırılacaq".

DEVAMM ölkə rəhbərliyini bu maddəni layihədən çıxarmağa, ölkə ictimaiyyətinə və vətəndaş cəmiyyəti qurumlarına insan haqlarını pozan bu müddəanı aradan qaldırmaq üçün mümkün təsirlər göstərməyə çağırır.