Bir qrup tanınmış siyasətçi, politoloq, hüquq müdafiəçisi, qeyri-hökumət təşkilatı nümayəndəsi və jurnalist Milli Məclisin deputatlarına "Təhsil haqqında" qanun layihəsində dini etiqad və vicdan azadlığını pozan müddəa ilə bağlı müraciət edib.

Müraciətdə qeyd edilir ki, "Təhsil haqqında" qanunun 11-ci maddəsinin 1.8 bəndində "Azərbaycan Respublikasının bütün təhsil müəssisələrində təhsialanların, təhsilverənlərin və digər işçilərin baş örtüyündə (hicab, çadra və s.) və digər dini geyimlərdə gəlmələrinə yol verilmir" kimi insan haqlarına zidd olan bir müddəa yer alıb.

Müraciət müəllifləri deputatların diqqətinə çatdırırlar ki, bu müddəa konstitusiyanın dini etiqad azadlığını təmin edən prinsipləri ilə, habelə Azərbaycanın qoşulduğu beynəlxalq hüquqi sənədlərin dini etiqad və vicdan azadlığı, o cümlədən bu etiqadın ayrılmaz hissəsi olaraq baş örtüyünə olan hüququ təmin edən tələblərlə daban-daban ziddir: "Nəzərinizə çatdırırıq ki, qanunun bu bəndlə qəbulu bütöv bir vətəndaş kəsiminin ən ümdə insan haqlarından – təhsil almaq, dini etiqadına uyğun görünüşə malik olmaq kimi bəşəri hüquqlardan məhrum edilməsi demək olardı. Belə bir qanun qəbul olunarsa, ölkə parlamenti Azərbaycanı insan haqlarının pozulması baxımından misli görülməmiş bir geriləməyə məruz qoyacaq.

Biz hörmətli deputatların nəzərinə çatdırırıq ki, əqidə ilə bağlı qadağanı təsbit edən belə bir müddəanın qanuni qüvvəyə minməsi inanclı insanların marginallaşmasına gətirib çıxara, müxtəlif spekulyantların insanların dini hisslərilə möhtəkirlik etməsinə imkan yaradan bir amil olaraq dini zəmində ekstremizmə rəvac verən güclü impuls verə bilər.

Biz inanırıq və ümid edirik ki, sağlam düşüncə qalib gələcək və bu müddəa bir anlaşılmazlıq olaraq aradan götürüləcək. Biz bu müddəanın qanun layihəsindən çıxarılması, inanclı insanların hüquqlarının qorunması xahişi ilə sizə müraciət edirik".

Müraciəti imzalayanlar:

Akif İslamzadə
Arif Əliyev
Arzu Abdullayeva
Çingiz Sultansoy
Elçin Behbudov
Eldar Namazov
Eldəniz Quliyev
Əli Abbasov
Əli Əliyev
Əli Kərimli
Ərəstun Oruclu
Erkin Qədirli
Fərda Əsədov
Fuad Süleymanov
Hacı İlqar İbrahimoğlu
Hacı Sabir Həsənli
Hikmət Hacızadə
İlqar Həsənli
İntiqam Əliyev
İradə Bağırova
İradə Cavadova
İsa Qəmbər
Kamil Vəli Nəriman oğlu
Leyla Yunus
Məhərrəm Zülfüqarlı
Mehman Əliyev
Mirvari Qəhrəmanlı
Murad Sadəddinov
Niyazi Mehdi
Novella Cəfəroğlu
Qubad Bayramov
Rasim Musabəyov
Rauf Arifoğlu
Rauf Mirqədirov
Rəhman Bədəlov
Rəna Sadəddinova
Rəşad Hüseynli
Rəşid Hacılı
Sabit Bağırov
Şahvələd Çobanoğlu
Samir İsayev
Səadət Bənənyarlı
Səidə Qocamanlı
Sərdar Cəlaloğlu
Seyid Camal
Toğrul Cuvarlı
Vahid Qazi
Yaşar Zeynalov
Zamin Hacı
Zəfər Quliyev
Zərdüşt Əlizadə