Bu gün Azərbaycanda Bakı İslam Universitetində, o cümlədən Bakı Dövlət Universitetinin ilahiyyat fakultəsində dini təhsil alan tələbələr var. İldən-ilə onların sayında artım müşahidə olunur.

SalamNews Azərbaycanda dini təhsilin səviyyəsilə bağlı dinşünasların rəyini öyrənib.

Əvvəllər Bakı İslam Universitetinin müəllimi olmuş, hazırda Ukraynada müalicə alan dinşünas Hacı Namiq Babaxan deyib ki, dini təhsil Azərbaycanda çox bərbad vəziyytədədir və bu da təbiidir. Uzun illər dinə qadağa olmuş ölkədə azadlıqdan sonra birdən-birə din alimləri peyda ola bilməz. Bu sahədə bizdə çiddi boşluq var. Azərbaycanda təkcə dini təhsil deyil bütün təhsilin vəziyyət bərbaddır. Axı istənilən halda dini elmlərə bizdə qadağa olub və din alimlərini şəhid ediblər indi bu dini elmlər harda güclüdürsə, gərək ordan bir müddət qidalanaq. Çox təəssüf ki, iqtidar bu adi məsələni çətinliyə salır. Dini sahədəalimlərimiz var amma hələ çox azdır. Elmsizlik isə həmişə qaraguruhçuluqa səbəb olub. Bütün xaricdədini təhsil alanlara şübhə ilə yanaşmaq və fəaliyyətlərinə qadağa qoymaq düzgün deyil. Hazırkı Qafqaz Müsəlmanları İdarəsinin rəhbərliyinin əksəriyyəti Özbəkistanda təhsil alıb, və digər sahələrdə Rusiyada, Ukraynada, ABŞ-da təhsil alan insanlar var, onda gərəg onlara da şübhə ilə yanaşıklsın və fəaliyyətlərinə qadağa qoyulsun?! Dini təhsil sahəsində boşluqu doldurmaq üçün daxildə din alimləri yetişdirmək çox agır və çətin prosesdir, ən əsası isə bu işi görəcək kadrlar yoxdur.

İlahiyyatçı alim, “Mənəvi Saflığa Dəvət” İctimai Birliyinin sədri, fəlsəfə doktoru Elşən Mustafaoğlu deyib ki, getdikcə bu sahədə irəliləyişlərin şahidi oluruq. Amma bununla belə, hələ görüləsi işlərimiz çoxdur. 70 illik ateist rejiminin ən çox zədələdiyi sahələrdən biri də elə budur. Cəmiyyətimiz dini biliklər almaq imkanından məhrum olmuş, böyük alimlərimiz bolşevik rejimi tərəfindən məhv edilib. İndi bu sahədə kövrək addımlar atılır. Ümid edək ki, İnşallah, getdikcə İslam alimlərimizin, savadlı ilahiyyatçılarımızın sayı artacaq. Həmd olsun Allaha ki, artıq bunun ilk işıltılarının şahidiyik.

Bakı İslam Universitetindən bildiriblər ki, universitetimizdə güclü bacarıqlı kadrlar var. Onların ruhani tələbə kimi yetişməsi üçün hər cür şərait yaradılıb.

Xatırladaq ki, bu ilin sentyabrında Azərbaycan və Rusiya Federasiyası din xadimləri və ilahiyyatçıları birgə bəyanat qəbul ediblər. İki ölkənin din xadimlər və ilahiyyatçıları xoş məramlarla bir sıra praktiki addımları atmağa hazır olduğunu bildiriblər.

Bəyanatda deyilir ki, müxtəlif konfessiyalardan olan din xadimlərinə Moskva Dövlət Linqvistik Universitetinin dini təhsil üzrə Ali təhsil müəssisələri arası Şurası nəzdində MDB çərçivəsində dinlərin qarşılıqlı əlaqələri probleminə dair Beynəlxalq Tədqiqat Konsorsiumu yaratmaq təklifi olunsun.