Xəbər verdiyimiz kimi, Türkiyənin CHP millət vəkili Ali Özgündüz parlamentdə Milli Bayramlar və Ümumi Tətillər Haqqında Qanunda dəyişiklik edilməsi haqda təklif irəli sürüb.

O, TBBM-də təklif edib ki, Aşura günü qeyri-iş günü kimi qeyd edilməsilə bağlı qanun qəbul edilsin. Mövzu ilə bağlı Deyerler.org-a eksklüziv açıqlamasında TBBM-nin üzvü, CHP İstanbul millət vəkili Ali Özgündüz bildirib: “Parlamentdə təklif etdik ki, Məhərrəm ayının 10-cu günü olan Aşura günü qeyri-iş günü elan edilsin. Çünki Türkiyədə olan milyonlarla Əhli-beyt (ə) yolçuları olan vətəndaşlarımız bu günü yas, matəm olaraq anır. Ona görə də elə edək ki, bu insanlar iş yerlərindən izn almaq məcburiyyətində qalmasın. İnsanlar tətildə daha rahat və uyğun bir şəkildə inanclarına, dini etiqadları uyğun matəm mərasimlərini yerinə yetirsinlər” .
Azərbaycanda da ölkənin böyük əskəriyyəti bu əza mərasimlərinə qatılır və eyni narahatlıq Azərbaycan vətəndaşları üçün də illərdir ki, gündəmdədir. Eyni təşəbbüs Azərbaycan parlamenti qarşısında da qaldırıla bilinərmi? Azərbaycan Respublikası Milli Məclisinin üzvü, “Ümid” Partiyasının sədri İqbal Ağazadə hesab edir ki, eyni təşəbbüslə MM-də də çıxış etmək olar.Mövzü ilə bağlı eksklüziv açıqlamasında millət vəkili İ.Ağazadə Deyerler.org-a deyib: “Heç kəsə sirr deyil ki, Azərbaycanda da Aşura mərasimləri uzun illərdir ki, xüsusi mərasimlər kimi qeyd olunur. Hətta Sovet dönəmində də bu mərasimlər qeyd olunub. Azərbaycan əhalisinin böyük kəsiminin məhz Əhli-beyt (ə) yoluna yaxındır və bu məzhəbə bağlıdır. Həmin vətəndaşlarımızın da əksəriyyəti bu mərasimlərdə fəal iştirak edirlər. Hər kəs bu mərasimlərin verdiyi imkanlardan faydalanıb, məscidlərdən tutmuş bu matəm mərasimlərinin keçirildiyi yerlərə qədər gedir. Hesab edirəm ki, bu günü tam şəkildə qeyri-iş günü etmək mümkündür. Amma “din dövlətdən ayrıdır” məsələsində fərqli mövqelər ortaya çıxa bilər. Buna baxmayaraq, hesab edirəm ki, bu, mümkün variantlardan biridir və bu məsələni MM-də müzakirə etmək olar”.
Özünün MM-də belə bir təşəbbüslə çıxış edə biləcəyini istisna etməyən İ.Ağazadə açıq cəmiyyətin tərəfdarı olduğunu bildirir: “Biz açıq cəmiyyətin tərəfdarıyıq. İnanclı insanların da cəmiyyətimizdə hüquqlarının qorunmasının tərəfdarıyıq. Güman edirəm ki, bu istiqamətdə gələcəkdə dindarlarla məsləhətləşib, bu işi həyata keçirmək və qanun layihəsini əsaslı şəkildə işləyib MM-ə təqdim edilməsini təşkil etmək olar”.