Qafqaz Müsəlmanları İdarəsində (QMİ) şeyxulislam Hacı Allahşükür Paşazadənin noyabrın 28-də İrəvanda keçirilən MDB dövlətlərinin Dinlərarası Şurasının iclasında iştirakının yekunlarna dair mətbuat konfransı keçirilib.

SalamNews-un məlumatına görə, mətbuat konfransında QMİ-nin sədr müavini Hacı Sabir Həsənli bildirib ki, şeyxulislam Hacı Allahşükür Paşazadə islasda Dağlıq Qarabağ məsələsinə dair mövqe bildirib.

O, şeyxin iclasda dediyi sözləri olduğu kimi təqdim edib: "Bütün problemlərin fövqündə duran sülh məsələsinə gəlincə, biz, din xadimləri dünyada MDB məkanında mövcud olan bütün münaqişələrin dinc yolla həlli naminə cəmiyyətimizə sülh ruhunu aşılamalı, siyasi rəhbərlərin bu yöndə səylərinə dəstək verməliyik. Təəssüf edirəm ki, tarixən dinlərarası dialoqun formalaşması proseslərinə öz töhfəsini vermiş MDB məkanında, eyni zamanda Qafqazda milyonlarla əhalinin qaçqın həyatı yaşaması bu günün reallığıdır. Bu isə öz növbəsində, MDB ölkələrinin, habelə Qafqaz bölgəsinin ümumi inkişafı, əhalinin firavan həyatı üçün böyük maneələr yaratmaqdadır. Odur ki, bu problemin sülh yolu ilə həlli üçün həm regionda, həm də beynəlxalq müstəvidə səylər davamn etdirilməlidir".

Allahşükür Paşazadə İrəvandakı çıxışında bildirib ki, Minsk Qrupunun həmsədr ölkələrinin başçılarının səylərini, ölkə başçılarımızın görüşlərini tam dəstəkləyirik: "Amma təəsüf ki, bu günə qədər nə BMT TŞ məlum qətnamələri yerinə yetirilib, nə də münaqişənin həlli üçün yaradılan ATƏT Minsk Qrupunun və onun həmsədrlərinin uzun sürən səyləri nəticə verməyib. Bununla belə bu istiqamətdə işlərin davam etdirilməsini önəmli sayırıq və din xadimi olaraq bu proseslərdə yardımçı olmağa hazırıq".

QMİ sədri iclasda bildirib ki, din xadimi olaraq, Dağlıq Qarabağ münaqişəsinin müharibə deyil, beynəlxalq hüquq çərçivəsində ədalətli həllinə töhvə verən bütün səyləri alqışlayırıq. Rus pravoslav kilsəsinin vəsitəçiliyi ilə erməni kilsəsi ilə dəfələrlə görüşlərimiz də nəticəsiz olmamışdır. Əldə edilmiş razılaşma əsasında əsirlərin dəyişdirilməsi, mənəvi irs abidələrinin qarşılıqlı qorunması və digər məsələlərdə əməli addımlar atmaq, ən əsası isə münaqişənin dinlərarası toqquşma müstəvisinə keçməsinin qarşısını almaq mümkün olub".

QMİ-nin sədr müavini Hacı Sabir Həsənli onu da vurğulayıb ki, şeyxulislam A.Paşazadə səfər çərçivəsində İravanın mərkəzində yerləşən tarixi Cümə məscidini də ziyarət edib. XVIII əsrin yadigarı olan bu Azərbaycan məscidi hazırda burada yaşayan və işləyən müsəlmanların ibadət məkanı kimi fəaliyyət göstərir. Azərbaycan nümayəndə heyəti burada ziyarət namazı qılıblar.