Məkkədən qayıdan azərbaycanlı hacılardan bir qrupu Türkiyənin Çorum vilayətində qalıb. Buna səbəb onları gətirən avtobusun sıradan çıxmasıdır.

Hazırda Çorumda olan Hacı Rauf Mədətovun verdiyi məlumata görə, xarab olan avtobusda 29 nəfər var. Onlardan 4-ü xəstədir. Hacı Rüstəm Əzizov isə avtobusun təmirinə kömək etmək istəyərkən, çanaq sümüyünü sındırıb. İki nəfər yaşlı qadın isə avtobusda dəm qazından zəhərlənib və hazırda müalicə alır. Çorum vilayətindəki çovğun və şaxta isə soydaşlarımızın vəziyyətini daha da pisləşdirib. Hacıların çıxılmaz vəziyyətdə qaldığı görən yerli polis əməkdaşları onlara yardım edib. Azərbaycanlı hacılar hazırda Çorumdakı polis bölməsindədirlər. Hacı Rauf Mədətovun sözlərinə görə, onlar Məkkədən 8 avtobusla çıxıblar. Məlumat verilib ki, ən geci dekabrın 29-da Bakıda olacaqlar. Lakin avtobuslardan biri xarab olub və karvandan geri qalıb. Hazırda həmin avtobus təmirdədir və 29 hacının Yeni ilə qədər Bakıya çatıb-çatmayacağı sual altındadır.

Hacıların sözlərinə görə, artıq üçüncü gündür ki, yolda qalsalar da, onlarla maraqlanan və heç olmasa xəstələrin təyyarə ilə Bakıya çatdırılmasını təşkil edən yoxdur.

Qafqaz Müsəlmanları İdarəsinin sədr müavini Hacı Salman Müsayev hacılardan kiminsə yolda qalması barədə heç bir məlumata malik deyil.