Bir uşaq öz diribaşlığı və fərasəti ilə hamını heyrətə salmışdı.

Bir nəfər ona deyir: «İstəyərdim ki, sənin kimi bir oğlum olsun». Uşaq cavab verir: «Burada çətin nə var ki? Atamı öz arvadının yanına apar, onda sənin də mənim kimi oğlun olar».


Bir bədəvi ərəb Allaha bu cür dua edirdi: «Ey Allah! Anamın günahlarını bağışla!». Ondan soruşdular ki, niyə atan üçün dua etmirsən? Ərəb söylədi: «Anam zəif qadındır, köməyə ehtiyacı var. Atam isə zirək adamdır, özü özünə çarə edə bilər».


Bir nəfər başqasının evinə zorla soxulub, oranı qəsb etmişdi. Ev sahibi öz mülkünü müdafiə etmək üçün qazinin yanına şikayətə gedir. Qazi məsələni araşdırıb görür ki, həqiqətən, ev sahibi haqlıdır. Ona görə də üzünü qəsbkar şəxsə tutub soruşur: «Bu kişinin əlində sənədi var ki, mülk onundur. Bəs, sən öz hüququnu nə ilə sübuta yetirə bilərsən?». Həmin adam cavab verir: «Mən göydən düz həmin evin içinə düşmüşəm, ona görə də, bu ev mənimdir». Qazi əmr verir ki, ona yüz şallaq vursunlar. Cəza icra ediləndən sonra qazi deyir: «Bilirsən, səni niyə şallaqladım? Ona görə ki, gələn dəfə göydən düşəndə başqasının evinə yox, öz evinə düşəsən».