Rejimin Məsləhətini Müəyyənləşdirən Qurumun qatı mühafizəkar üzvlərindən olan Murtuza Nəbəvi İranın dini rəhbəri ayətullah Seyid Əli Xamneyinin səlahiyyətlərini artırmaq üçün ölkə konstitusiyasına dəyişiklik təklifi irəli sürüb.

M.Nəbəvinin təklifində İran prezidenti Mahmud Əhmədinejad və parlament sədri Həddad Adilin səlahiyyətlərinin azaldılmasına işarə olmasa da, dini rəhbərin nəzarəti altında iqtisadi qərarların qəbulu üçün özəl bir qurumun yaradılmasına təkid edilib. Bu təklif həyata keçirilərsə, ayətullah Əli Xamneyinin saysız-hesabsız səlahiyyətləri ilə yanaşı ölkənin iqtisadi siyasətinin müəyyənləşdirilməsi də ona tapşırılacaq.

Bazar və əsnafın (korporasiya) islami qurumları cəmiyyətində çıxış edən M.Nəbəvi konstitusiyada dəyişiklik apararaq dini rəhbərin nəzarəti altında fəaliyyət göstərəcək iqtisadi və mədəni yönlü ən azı iki qurumun təsis edilməsi təklifini irəli sürüb: "İqtisadiyyat və inkişaf məsələri ilə əlaqədar ali bir şura yaradılmalıdır ki, iqtisadi məsələrlərdə hər kəs öz sazını çala bilməsin. Belə görünür ki, konstitusiyaya bir ali mədəni inqilab şurasını, həmçinin də bir ali iqtisadi məsələlər şurasını əlavə etmək lazımdır".