İranda hadisələrin hərbi müstəviyə keçməsi ehtimalı olmasına baxmayaraq, indiki mərhələdə belə bir məsələ gündəmdə deyil.

Bunu SalamNews-a açıqlamasında Milli Məclisin deputatı, politoloq Rasim Musabəyov bildirib.

“Nəzərə alaq ki, Çin və Rusiya İrana hərbi müdaxilənin tam əleyhinədirlər. Bununla yanaşı, bir sıra Avropa ölkələri də İrana qarşı hərbi müdaxiləyə tərəddüd edir və ya əleyinə çıxır. Ona görə də hesab etmirəm ki, hansısa düşünülməmiş addımlar atılsın və məsələ hərbi müdaxilə həddinə çatsın”, - politoloq bildirib.

Onun sözlərinə görə, indiki məqamda müharibənin daha çox media vasitəsi ilə davam etdirilmə yolu seçilib: "Yəni bununla İranı tutduğu mövqedən geri çəkilməyə vadar etməyə çalışırlar. Ikinci amil isə İrana qarşı hərbi müdaxiləni təxirə salmaqla Rusiya və Çini bu ölkəyə qarşı tətbiq edilən sanksiyalara qoşmaqdır”.

Politoloq onu da əlavə edib ki, İrana təzyiqlərin arxasındakı üçüncü amil onu Suriyaya verdiyi dəstəkdən məhrum etməkdir. "İranı Suriyaya verdiyi dəstəkdən imtinaya vadar etmək niyyəti də mövcuddur. Yəni İran Suriya məsələsində toqquşma səviyyəsinə çatmasın. Burada Qərbin məqsədi çoxşaxəli diplomatik vasitələrdən istifadə etməklə İranı geri otuzdurmaqdır”, - millət vəkili bildirib.