Prezident Administrasiyasının ictimai-siyasi məsələlər şöbəsinin müdiri Əli Həsənovun başçılıq etdiyi Azərbaycan nümayəndə heyəti dekabrın əvvəllərində İrana səfərə gedəcək. Bu barədə SalamNews-a Ə.Həsənov məlumat verib.

Şöbə müdiri səfərin məqsədi və digər detalları barədə açıqlama verməyib.

Lakin İran mətbuatının yaydığı məlumata görə, səfər İslam Respublikası tərəfinin dəvəti ilə reallaşacaq. Səfər çərçivəsində iki ölkə arasında mövcud ictimai-siyasi əlaqələr, o cümlədən mətbuat, informasiya, teleradio və təbliğat sahəsindəki vəziyyət, həmçinin, gələcək əməkdaşlığın prinsipləri müzakirə ediləcək. Səfər çərçivəsində İranda müxtəlif çevrələr tərəfindən aparılan anti-Azərbaycan, eyni zamanda Azərbaycanın müəyyən dairələrinin apardığı anti-İran təbliğatı, bu kimi xoşagəlməz halların qarşısının alınması məsələlərinin də müzakirə ediləcəyi gözlənilir. Səfər zamanı Əli Həsənovu Rabitə və İnformasiya Texnologiyaları Nazirliyi, Milli Televiziya və Radio Şurası, Teleradio İstehsalat Birliyi və digəri qurumların nümayəndələrinin müşayiət edəcəyi gözlənilir.