DEVAMM - Dini Etiqad və Vicdan Azadlıqlarının Müdafiə Mərkəzi Təhsil haqqında Azərbaycan Respublikası Qanunun layihəsində dini etiqad və vicdan azadlığını pozan müddəa ilə bağlı ölkə rəhbərliyinə, Milli Məclisə, əlaqədar dövlət qurumlarına və ictimaiyyətə müraciət qəbul edib.

Müraciətdə deyilir ki, qanunun 11.1.8 bəndində Azərbaycan Respublikasının bütün təhsil müəssisələrində təhsil alanların, təhsil verənlərin və digər işçilərin baş örtüyündə (hicab, çadra və s.) və digər dini geyimlərdə gəlmələrinə yol verilmir kimi insan haqlarına qarşı yönələn bir müddəa yer alıb.

DEVAMM bü müddəanın ölkə Konstitusiyasının dini etiqad azadlığını təmin edən prinsipləri ilə, habelə Azərbaycanın qoşulduğu beynəlxalq-hüquqi sənədlərin dini etiqad və vicdan azadlığı, o cümlədən bu etiqadın ayrılmaz hissəsi olaraq baş örtüyünə olan hüququ birmənalı olaraq təmin edən tələblərlə daban-daban zidd olduğunu bəyan edir.

DEVAMM ölkə rəhbərliyinə, Milli Məclisə bu müddəanın qanun layihəsindən çıxarılması, inanclı insanların hüquqlarının qorunması xahişi ilə müraciət edir.Təşkilat ölkə ictimaiyyətinə, vətəndaş cəmiyyəti qurumlarına insan haqlarını pozan bu müddəanın qanun layihəsindən götürülməsi üçün bütün mümkün yardımları etmək çağırışı ilə müraciət edir.