Hüquq müdafiəçiləri isə Bağdadi Əli əl-Mahmudinin ekstradisiyadan sonrakı taleyindən narahatdırlar

Tunisin Apellyasiya Məhkəməsi Liviyanın keçmiş baş naziri Bağdadi Əli əl-Mahmudinin ölkəsinə ekstradisiya olunması ilə bağlı qərar qəbul edib. Məlumatı “Reuters” agentliyi keçmiş hökumət başçısının vəkilinə istinadən yayıb.



70 yaşlı Bağdadi Əli əl-Mahmudini məhkəmə gözləyir. Onun vəkili müştərisinin taleyi ilə bağlı narahatlığını ifadə edib, Tunis məhkəməsinin qərarını ədalətsiz və siyasi motivli olduğunu bildirib.



Keçmiş yüksək rütbəli məmurun ekstradisiyası ilə bağlı sorğu Tunisə Liviyanın hazırkı hakimiyyəti tərəfindən göndərilib və əvvəlcə müraciətə müsbət cavab verilməyib.



Bağdadi Əli əl-Mahmudi Müammər Qəddafinin hakimiyyəti illərində hökumətə başçılıq edib. O, bu il yayın sonlarında, Qəddafi rejiminin devrilməyə yaxın olduğu aydınlaşanda Liviyanı tərk edib. O, sentyabrın 21-də Tunisin Əlcəzairlə sərhədində saxlanılıb. Bağdadi Əli əl-Mahmudi dövlət sərhədini pozmaqda ittiham edilib. Sonradan isə məhkəmə ona bəraət verib. Bundan sonra keçmiş baş naziri Tunis məhkəməsinin ekstradisiya barədə qərarını gözləyib.



“Amnesty International” hüquq müdafiəsi təşkilatı Tunis hakimiyyətini Bağdadi Əli əl-Mahmudini ekstradisiya etməməyə çağırıb. Hüquq müdafiəçiləri hesab edirlər ki, onunla bağlı məhkəmə qanun pozuntuları ilə keçiriləcək, keçmiş baş nazirin özü isə işgəncələrə məruz qala bilər./anspress/


Bütün hüquqlar qorunur.