Bu gün zəvvarlar Həcc ziyarətinin ən vacib dini ayinlərindən biri olan Mina vadisində şeytanı daşlama ayinini yerinə yetiriblər. Bu dini ayin Həcc ziyarətinin ən təhlükəli mərasimi hesab edilir.

Səbəb isə onun icrası zamanı sıx izdihamın yaşanması və nəticədə yaşlı və zəif zəvvarların ayaq altında qalması və ya özlərin pis hiss edərək huşlarını itirmələridir. İki il əvvəl yaşanmış bu cür izdiham zamanı 360 zəvvar həlak olmuşdu. Bu il şeytanı daşlama əməliyyatı insidentsiz ötüşüb. Əməliyyatdan sonra müqəddəs torpaqda qurbankəsmə mərasimi həyata keçirilib.

Qafqaz Müsəlmanları İdarəsinin sədr müavini Hacı Salman Musayevin verdiyi məlumata görə, aəzərbaycanlı zəvvarlar da heç bir problemsiz dini ayinləri yerinə yetirərək qurbanlarını kəsiblər.

Həcc ziyarətində olan azərbaycanlı zəvvarlar dekabrın 22-dən etibarən evlərinə dönməyə başlayacaqlar. Həcc ziyarəti üçün vacib olan ayinlər isə sabah yekunlaşacaq

Qeyd edək ki, dünyanın bütün müsəlman ölkələrində qurban bayramı yüksək səviyyədə qeyd olunur. Pakistanda qurbanlıqlar əsasən iribuynuzlu heyvanlardan və dəvələrdən seçilir. Bayram günü bu heyvanlar xüsusi olaraq bəzədilir. Eləcə də qurbankəsilməsi prosesinə başlamazdan əvvəl xüsusi mərasimlər, məsələn, xüsusi bıçaqların itilənməsi mərasimi keçirilir. Bu il də yüzlərlə pakistanlı qurbanların kəsilməsi üçün ayrılmış xüsusi ərazidə müsəlman borcların yerinə yetiriblər.

Bosniyalı minlərlə müsəlman da ənənəvi bayram namazını qılmaq üçün bu gün Sarayevonun məscidlərə axışıb, əmin-amanlığın olması üçün dualar edilib. Bayramla bağlı ölkənin müxtəlif yerlərində yarmarkalar təşkil olunub.

Əfqanıstanda isə bayram tədbirlərində ölkə prezidenti Həmid Karzay da iştirak edib. O, sadə vətəndaşlarla birgə bayram namazı qılaraq ölkənin əmin-amanlığı üçün dualar edib.