Bir neçə gün öncə Fələstinin YUNESKO-ya üzv seçilməsi İsrail rejimində çox ciddi narahatçılığa səbəb olub. Artıq Fələstin dövlətinin tanınmasının qaçılmaz olduğunu hiss edən sionist rejim başını o qədər itirib ki, hətta müttəfiqləri ilə razılaşdıqları prinsipləri də tapdamağa başlayıb. Belə ki, rejim Şərqi Qüds və Qərbi Şəriyədə 2000 evlik yəhudi məskunlaşma məntəqəsinin salınması işlərinin sürətləndirilməsi barədə tələsik qərar verib.

Bu hadisəyə reaksiyalar isə dərhal verilib. Ağ Evin mətbuat katibi Cey Karney İsrail rejiminin bu qərarının bölgədə sülhün əldə olunmasına mənfi təsir göstərəcəyini, bu qərarın məyusedici olduğunu qeyd edib.

Fransa xarici işlər nazirliyinin mətbuat katibi Bernard Valero da İsrail rejiminin atdığı bu addımı kəskin şəkildə qınayıb. Sözçü bu qərarın beynəlxaq hüquqa zidd olduğunu və atılmış addımın bölgədə sülh danışıqlarına mənfi təsir edəcəyini bildirib.

İngiltərə XİN rəhbəri Vilyam Xeyq də İsrail rejiminin bu qərarını pisləyib. Xeyqin sözlərinə görə, bu qərar Yaxın Şərqdə sülhün bərqərar olmasına böyük bir zərbədir, bu tikinti proqramı beynəlxalq hüquqlar baxımından qanunsuzdur, atılan bu addım təxribat xarakterli və sülh danışıqlarını mənasız edən bir addımdır.

Görünən odur ki, sionist rejim artıq əvvəlki kimi istədiyini edib dəstək görmür. Ən yaxın müttəfiqləri olan ölkələr artıq İsrail rejimini tənqid edir. Əsər işğalçı rejim qanunsuz tikililəri dayandırmasa, ehtimal ki, bu tənqidlər sadəcə sözdə qalmayacaq, İsrail rejimi ilə müttəfiqlərİ arasında daha ciddi problemlərə səbəb olacaq./Deyerler.Org/