Deyerler.Org: “Bu yenə də növbəti dəfə ABŞ-ın, ümumiyyətlə böyük dövlətlərin, dünyada baş verənlərə təsiri olan güclü dövlətlərin ikili standartlarından xəbər verir. Bu mənim üçün şəxsən qeyri-adi olmadı. Çünki buna bənzər ABŞ-ın Dağlıq Qarabağla bağlı da yanlış addımları olmuşdu.

Bundan başqa Amerika işğalçı Ermənistana yardımları davam etdirir, 907-ci düzəlişi isə Azərbaycana tətbiq etmişdi və s. Yəni bu qədər haqlı vəziyyətdə olduğumuza rəğmən Amerikanın bizə tətbiq etdyi bir çox addımlarda haqsızlığı biz həyatımızda, siyasi tariximizdə şahidi olmuşuq”. Bunu “Asiya Dialoqu” İB-nin sədri Sevil Nuriyeva Deyerler.Org-a açıqlamasında bildirib.

YUNESKO-nun Fələstini üzvlüyə qəbul etməsindən sonra ABŞ dərhal bu quruma etdiyi illik yardımı dayandırdığını bəyan edib. S.Nuriyeva hesab edir ki, bu hüququn və demokratiyanın aliliyini dəstəkləyən Amerikanın prinsiplərinə yaddır: “Bunun amerikan siyasi duruşuna yaraşmadığını demək istəyirəm. Bunu sadəcə ikili standart hesab edirəm. BMT-nin dövlət kimi tanıdığı, bunun müqabilində xeyli əvvəldən İsrailin tanınmasına rəğmən, hələ də Fələstin dövlətinin qurulmasına göz yummaq, hələ üstəlik Amerikanın YUNESKO-ya maliyyə yardımını kəsməsini siyasi etiketə, siyasi əxlaqa uyğun hesab etmirəm”, - deyə xanım Nuriyeva durumu şərh edərkən bildirib.