Nərimanov Rayon Məhkəməsində mayın 6-da Bakıda keçirilmiş “Hicaba azadlıq” aksiyasına görə həbs olunan ilahiyyatçı Taleh Bağırov və dindar Elşən Abbasovun məhkəməsi keçirilib.

İlahiyyatçı T.Bağırovun vəkili Anar Qasımlı SalamNews-a bildirib ki, dünənki proses hakim Turqay Hüseynovun sədrliyi ilə keçib.

Prosesdə hakim Turqay Hüseynovun sədrliyinə etiraz vəsatəti qaldırıb: “Turqay Hüseynov Taleh Bağırova 15 sutka inzibati həbs cəzası çıxaran hakimdir. Onun hüquqlarını müdafiə etdiyim şəxsə bəraət vermək imkanı yoxdur. Çünki bu hakim artıq hicab işi üzrə Taleh Bağırovu təqsirli bilib. Vəsatəti qaldırdım, bundan sonra hakim yarım saatlıq müşavirə elan etdi. Qaıytdıqdan sonra vəsatəti əsassız hesab edərək baxılmamış saxladı”.

Daha sonra təqsirləndirilən şəxslər və bir nəfər şahid ifadə verib. Taleh Bağırov ona qarşı qaldırılmış ittihamın aydın olmadığını deyib, cinayət işinin əsassız olduğunu vurğulayıb.

Məhkəmə noyabrın 18-i saat 11.00-da davam edəcək.

Xatırladaq ki, T.Bağırov və E.Abbasov Azərbaycan Respublikasının Cinayət Məcəlləsinin 233-cü maddəsi ilə (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə), (3 ilə qədər həbs) ittiham olunurlar. Sonra Cinayət Məcəlləsinin 221.2-ci maddəsi ilə yeni ittiham əlavə olunub (5 ilə qədər həbs). Həbs edildikdən sonra Hacı Tale barəsində əvvəlcə 15 sutka, daha sonra isə 2 aylıq həbs qətimkan tədbiri seçilib və Kürdəxanı təcridxanasına göndərilib.