İstanbulda Türkiyənin Orta Doğu Texniki Universiteti (ODTÜ), Türkiyə Odalar və Borsalar Birliyi Universitetinin (TOBB) birgə təşkilatçılığı və Türkiyə Xarici İşlər Nazirliyi nəzdindəki Strateji Araşdırmalar Mərkəzinin dəstəyi ilə “Türkiyə-Ermənistan münasibətlərinin normallaşması prosesi: yenidən canlandırma perspektivi” adlı beynəlxalq tədbir keçiriləcək.

Azərbaycan Prezidenti yanında Strateji Araşdırmalar Mərkəzindən APA-ya verilən məlumata görə, oktyabrın 29-30-da keçiriləcək tədbirdə Azərbaycan, Türkiyə, Ermənistan və müxtəlif ölkələrdən olan ekspertlərin iştirakı ilə Türkiyə-Ermənistan münasibətlərinin normallaşması prosesinin mövcud durumu və inkişaf perspektivləri, region dövlətlərinin iki ölkə arasındakı münasibətlərə baxışı, Cənubi Qafqazdakı siyasi vəziyyətin inkişaf dinamikası kimi məsələlər müzakirə ediləcək.

Tədbirdə SAM-ın eksperti Zaur Şiriyev də iştirak edəcək. Ekspert konfransın “Türkiyə-Ermənistan münasibətlərinin normallaşmasının regional və beynəlxalq tərəfləri” başlıqlı panelində Azərbaycanın məsələ ilə bağlı mövqeyi, Dağlıq Qarabağ münaqişəsinin bu kontekstdə həllinin vacibliyi və perspektivlərə dair məruzə ilə çıxış edəcək.

Konfransda Corc Vaşinqton Universitetinin professoru Kori Velt, Türkiyə Beynəlxalq Strateji Araşdırmalar Mərkəzinin sədr müavini, professor Kamer Kasım, Beynəlxalq Böhran Qrupundan Sabina Freyzer, eləcə də bir sıra ermənistanlı ekspertlər məruzə ilə çıxış edəcəklər.