Rəsmi Ankara zəlzələnin fəsadlarının aradan qaldırılması ilə bağlı İsrailin yardımını qəbul etməyib. Bu barədə İsrailin müdafiə naziri Ehud Barak məlumat verib.

SalamNews-un RBK-ya istinadən verdiyi xəbərə görə, nazir bu qərardan təəccübləndiyini, lakin təklifin qüvvədə qalacağını bəyan edib.

"Bizdə elə fikir formalaşıb ki, Türkiyənin İsrailin yardımına ehtiyacı yoxdur. Lakin əgər onların fikri dəyişsə, yaxud yardıma ehtiyacları olsa, hər zaman bizə müraciət edə bilərlər.

Türkiyə tərəfi Rusiya da daxil olmaqla onlarla ölkədən yardımı təklifi aldıqlarını, lakin onların heç birinə müsbət cavab verilmədiyini, həmçinin, beynəlxalq ictimaiyyətə də yardım üçün müraciət etmədiklərini söyləyib.

Vurğulayaq ki, İsrail və Türkiyə uzun illər müttəfiq olublar. Lakin son vaxtlar bu münasibətlər kəskin şəkildə korlanıb. 2011-ci il sentybrın 6-dan etibarən isə Türkiyə keçmiş müttəfiqi ilə bütün ticarət və hərbi əlqələrini dayandırıb. Buna səbəb isə İsrailin 2010-cu ilin mayında "Azadlıq Flotiliyası"nda baş vermiş və 9 Türkiyə vətəndaşının öldürülməsi nəticələnən hadisələrlə bağlı üzr istəməkdən imtina etməsi olub.

Xatırladaq ki, dünən Türkiyənin cənub-şərqində yerləşən Van vilayətində 7,2 bal gücündə zəlzələ baş verib. Gecə saatlarında isə eyni bölgədə 6,1 bal gücündə daha bir yeraltı təkan qeydə alınıb.

Türkiyənin daxili işlər naziri İdris Naim Sahinin verdiyi məlumata görə, 117 nəfər Ərciş, 100 nəfərin isə Van şəhərlərində ölüb, 1090 nəfər isə xəsarət alıb.